Qanysh Sátbaev paıdalanǵan er-toqym
PAVLODAR. KAZINFORM - Akademık Qanysh Sátbaevtyń Baıanaýyldaǵy memorıaldyq mýzeıinde taý tulǵanyń er-toqymy saqtalyp tur. Bala Qanysh Baıanaýylda Shormanovtar saldyrǵan mektepke taıymen baryp-kelip júrgende osy erdi paıdalanǵan eken.
Baıanaýyldaǵy mýzeıde Qanaǵańnyń jeke zattary men ómir qatparlarynan syr shertetin fotojádigerler ǵalymnyń qıly taǵdyrynan biraz jaıdy uqtyrǵandaı. Sonyń ishinde ǵulamanyń bala shaǵynda paıdalanǵan er-toqymyna kózimiz tústi. Bul kóne jádigerdi osydan 12 jyl buryn Musa Shorman aýylynyń (Sátbaev týǵan aýyl) turǵyny Tastemir Shashenov esimdi azamat tapsyrypty. Taıǵa ertteletin, shaqtalǵan er-toqym aǵashtan shabylǵan, birneshe bólikten turady. Aldyńǵy bóliginde taza kúmisten zerlengen japsyrmasy bar.
Mýzeıdiń buqaralyq jumys jónindegi mamany Sansyzbaı Saparǵalıevtyń aıtýynsha, Qanysh Imantaıuly qazirgi Musa Shorman aýlynan 7-8 shaqyrym jerdegi Aıryq degen jaılaýda dúnıege kelgen. Bul aýyldyń janynda, Aşysý ózeniniń arǵy betinde kezinde Shorman áýletiniń qystaýy bolǵan
«El aýzynda «Sáken aǵaı» atanyp ketken Sádýaqas Shormanov Aqkelin bolysynda mektep saldyrǵany málim. Mektep kezinde Shormanovtardyń aǵash úıleri ornalasqan aýmaqta, qazirgi Musa Shormanovtyń kesenesine jaqyn jerde bolǵan. Sonda bala Qanysh kún saıyn taıyna minip, mektepke keledi eken. Mekteptiń ózi qaraǵaıdan qıyp salynǵan. Álgi jerde odan bólek, Shorman áýletine tıesili shamamen 6 qystaý-úı bolǵan. Ókinishke qaraı, 1928 jyly Baıanaýylda kámpeske qyzyp turǵan ýaqytta bolshevıkter qystaý men bilim uıasyn typ-tıpyl etip buzyp tastaıdy. Al bórenelerdiń barlyǵyn Qaraǵandy oblysyndaǵy Semizbuǵyǵa tasyp jetkizip, jataqhana turǵyzypty», - dep áńgimeledi S.Saparǵalıev.
Búginde Shormanovtardyń qystaýy men mektep orny mańaıy qorshalyp, aspan asty mýzeıine aınalǵan.
Eske sala keteıik, Qanysh Sátbaev pen Kemel Aqyshevtiń birge túsken fotosýretteri tabyldy.
