Qańǵybastar úshin ne mańyzdy tamaq pa, álde sharap pa - áleýmettik eksperıment
SEMEI. QazAqparat - Óskemendikter turaqty mekenjaıy joq turǵyndar arasynda áleýmettik saraptama júrgizdi. Olar kóshe kezgen panasyzdarǵa sharap pen tamaq usynyp, qaısysyn tańdaıtynyn anyqtady, dep habarlaıdy QazAqparat.
Eki jas dúkennen azyq-túlik pen sharap satyp alyp, kóshege shyqqan. Osylaısha panasyz, kóshede júrgenderge tańdaý jasaýdy ótingen. Jastar ózderiniń eksperımentterin beınejazbaǵa túsirgen.
«Men qazir sizge azyq-túlik tolǵan paket nemese bir shólmek sharap usynamyn. Siz qaısysyn alasyz?», - dedi jigit.
«Men sharapty tańdaımyn», - dep jaýap berdi azamat.
Áleýmettik jelige salynǵan beınerolık kópshilik arasynda ártúrli pikir týdyrdy.
«Bul tájirıbe úısiz-kúısiz júrgenderdi ishimdikke ózimiz yntalandyratynymyzdy kórsetetin sııaqty. Sonymen, biz olarǵa kómektesip júrmiz be, joq kerisinshe, zııanymyz tıip jatyr ma? Men ekinshisin durys dep esepteımin», - dep jazdy jeli qoldanýshylarynyń biri.
«Taǵy bir dálel, olardyń aqshany shynymen de qaıda jumsaıtyny belgili boldy. Bir ókinishtisi, olardyń arasynda tamaqtanǵysy keletinder de bar», - dep jazdy kelesi oqyrman.
Aıta ketý kerek, júrgizilgen tájirıbede turaqty jeri joq 10 adamnyń tek bireýi ǵana tamaqty tańdady. 
