Qańǵybas janýarlardan dermatomıkoz juǵýy múmkin - sanıtarlyq dáriger
ALMATY. KAZINFORM – Almaty qalasy sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly teri aýrýlary juǵýynyń negizgi sebepterin atady.
Onyń aıtýynsha, turǵyndar arasynda kezdesetin negizgi juqpaly teri aýrýlarynyń biri - dermatomıkoz.
- Aýrýdyń negizgi kózderi - úı janýarlary, ásirese qańǵybas ıtter men mysyqtar, sondaı-aq naýqas adamdar. Kóp jaǵdaıda patologııalyq protsess teri men shashty zaqymdaıdy. Sondyqtan teride nemese shashty bas bóliginde qandaı da bir bórtpeleri paıda bolsa, der kezinde dıagnoz qoıylyp, tıisti em taǵaıyndalýy úshin dereý dermatologqa júginý kerek. Aýrý rastalǵan jaǵdaıda, ınfektsııanyń odan ári taralýynyń aldyn alý úshin naýqaspen baılanysta bolǵan barlyq otbasy músheleri men basqa da tulǵalar tekserýden ótýi tıis, - dedi maman.
Sanıtarlyq dáriger bul aýrýdy juqtyrýdyń aldyn alý úshin kelesi erejelerdi saqtaýdy usynady:
- basqa adamdardyń bas kıimin, kıimderin, aıaq kıimin, taraǵyn, tósek-oryn jabdyqtaryn jáne jeke gıgıena zattaryn paıdalanbaý;
- qańǵybas mysyqtar men ıttermen baılanysta bolmaý;
- súlgi men tósek jabdyqtaryn ystyq sýda jýý;
- tek sanıtarııalyq talaptarǵa sáıkes dezınfektsııa júrgiziletin monsha, saýna, basseın jáne sport zaldarǵa barý;
- ata-analar balalardy jeke bas gıgıenasyn saqtaýǵa úıretip, qańǵybas janýarlarmen baılanysýdyń qaýiptiligin túsindirýi tıis;
- úı mysyqtary men ıtterde teri aýrýlarynyń alǵashqy belgileri baıqalǵan jaǵdaıda, olardy veterınarlyq klınıkaǵa aparyp, teksertip, emdeý qajet.
Eske salaıyq, buǵan deıin Almatyda týberkýlez syrqatynyń sany 20 paıyzǵa azaıǵanyn jazǵanbyz.