«Kanelonyń» promoýteri Golovkınmen úshinshi aıqastyń bolatynyn tuspaldady

ASTANA. QazAqparat - Meksıkalyq, orta salmaq álem chempıony Saýl Alvarestiń promoýteri Oskar De la Hoııa jankúıerleri men barlyq boks qoǵamdastyǵyna «Kanelonyń» qazaqstandyq Gennadıı Golovkınmen úshinshi aıqastyń ótýi múmkin ekenin aıtty, dep habarlaıdy  Sports.kz.

De la Hoııa Twitter-degi paraqshasynda GGG men Alvarestiń birinshi aıqasyndaǵy sýretti jarııalap, mynadaı jazba qaldyrdy: «Uly aıqastar boks úshin árdaıym jaqsy». Jankúıerler bul jazbany úshinshi aıqastyń anonsy retinde qabyldady.

Golovkın - «Kanelo» birinshi aıqasy daýly teń nátıjemen aıaqtaldy, ekinshi jekpe-jekte meksıkalyq sýdıalardyń basym daýysymen jeńiske jetti.

Aıta keteıik, Golovkın rıngke kelesi jyldyń kókteminde shyǵady degen boljam bar. Ol óziniń sońǵy kezdesýin 15 qyrkúıek kúni ótkizip, rematchta meksıkalyq Saýl Alvareske jeńilip, orta salmaqtaǵy ataqtarynyń barlyǵynan aıyrylǵan bolatyn.