«Kanelonyń» promoýteri Golovkınmen ekinshi aıqasqa qatysty boljam jasady
ASTANA. QazAqparat - Golden Boy Promotions kompanııasynyń basshysy Oskar de la Hoııa Gennadıı Golovkın men Saýl «Kanelo» Alvarestiń ekinshi jekpe-jegi týraly kelissózder men jekpe-jekten ne kútetini jaıly aıtyp berdi, dep jazady Sports.kz.
«Jekpe-jek boıynsha kelisim jasaý qıynǵa soqty. Kelissózder óte kúrdeli boldy, eki taraptyń kóńilinen shyǵý úshin ýaqyt qajet edi. Biz oǵan qol jetkizip, jekpe-jekti ótkizetin boldyq», - dedi De la Hoııa aıqasty saqtap qalý úshin óz qarjysyn salǵanyn aıta otyryp.
«Bul eki boksshy úshin de qıyn aıqas bolmaq. «Kanelo» Golovkınge qatty ashýly, jekpe-jek ekeýi úshin de mańyzdy. GGG «Kanelo» týraly biraz sóz aıtqannan keıin, Saýldiń boksqa degen yntasy artady. Ol burynǵydan da qatty jattyqpaqshy. Jekpe-jek ońaı bolmaıdy, biraq biz «Kaneloǵa» 100% senemiz.
Qyrkúıekte eki qarsylas ta bir-birin nokaýtqa túsirý maqsatynda shyǵady. Eshqaısysy aıqasty tóreshilerdiń sheshimine jetkizgileri kelmeıdi. Birinshi jekpe-jektiń teń nátıjemen aıaqtalýy daý týdyrǵan edi. Eger «Kanelo» nokaýtpen jeńse, boks koroli atanady. Men «Kanelonyń» Golovkındi nokaýtpen jeńetinine senimdimin», - dedi Oskar ESPN Deportes-ke bergen suhbatynda.
