«Kanelonyń» promoýteri Golovkınmen bolatyn úshinshi jekpe-jektiń basty shartyn aıtty

NUR-SULTAN. QazAqparat - WBA Super nusqasy boıynsha orta salmaqtaǵy álem chempıony Saýl «Kanello» Alvarestiń múddesin jaqtaýshy promoýter Oskar de la Hoııa meksıkandyqtyń IBF jáne IBO belbeýiniń ıegeri qazaqstandyq Gennadıı Golovkınmen bolatyn úshinshi jekpe-jegi týraly aıtty, dep habarlaıdy QazAqparat Sports.kz saıtyna silteme jasap.

Oskardyń sózine qaraǵanda, úshinshi aıqastyń taǵdyry Alvarestiń qalaýyna baılanysty:

— Árıne, halyqtyń osy aıqasty kórgisi keletini sózsiz, biraq sheshimdi «Kanelo» qabyldaıdy. Jaqynda biz kimmen jekpe-jekke shyǵatynymyzdy sheshemiz, — dedi Golden Boy Promotions basshysy ESPN Deportes-ke bergen suhbatynda.

«Kanelonyń» rıngke oralýy 2 mamyrǵa josparlanyp otyr, biraq qarsylasy áli anyqtalǵan joq. Al Golovkınniń kelesi jekpe-jegi 28 naýryzda Chıkagoda ótedi, qarsylasy - polshalyq Kamıl Sheremeta.