«Kanelonyń» promoýteri Golovkınge shart qoıdy

NUR-SULTAN. QazAqparat - Meksıkalyq boksshy Saýl Alvarestiń ókili, Golden Boy Promotions basshysy Oskar De La Hoııa qazaqstandyq Gennadıı Golovkınmen úshinshi jekpe-jekti uıymdastyrýǵa qatysty mańyzdy málimdeme jasady, dep jazady Sports.kz.

«Gennadıı Golovkın qyrkúıekte Saýl Alvarespen rıngke qaıta shyǵatynyna kúmánim bar. Men «Kanelomen» júz paıyz kelisemin - Golovkın burynǵy deńgeıine qaıta kóterilýi tıis. Saýl endi chempıon, oǵan tańdaýǵa bolatyn joldar óte kóp - ol 168 nemese 175 fýnt salmaq dárejesine deıin kóterilip, tarıhta esimin qaldyra alady. Eger Golovkın onymen jekpe-jek ótkizgisi kelse, ol álem chempıony belbeýin ıemdenýi tıis», - dep keltiredi ESPN De La Hoııanyń sózin.

Eske salaıyq, Golovkın men «Kanelo» arasyndaǵy birinshi jekpe-jek teń aıaqtalǵan bolatyn. Al revanshta tóreshilerdiń basym bóliginiń sheshimimen jeńis meksıkalyq boksshyǵa berildi.

GGG (38-1-1, 34KO) aldaǵy 8 maýsymda Nıý-Iorktegi (AQSh) Madison Square Garden arenasynda kanadalyq boksshy Stıv Rollspen (19-0, 10 KO) kezdesedi. Jekpe-jek aldynda qos boksshy Nıý-Iorkte baspasóz máslıhatyn ótkizdi. Sharadan keıin kóz arbasý rásimi ótti. Boks keshine bıletterdiń baǵasy 50, 100, 200, 300, 500 jáne 750 dollardy quraıdy.