«Kanelonyń» promoýteri GGG-ǵa úshinshi jekpe-jektiń shartyn aıtty

ASTANA. QazAqparat - Golden Boy promoýterlik kompanııasynyń basshysy Oskar de la Hoııa Gennadıı Golovkınniń «Kaneloǵa» qarsy úshinshi jekpe-jegi tek olardyń talaptary oryndalsa ǵana ótetinin aıtty, dep jazady Sports.kz.

Bul joly meksıkalyq boksshynyń ókilderi GGG-ǵa «al nemese ket» prıntsıpine negizdelgen talabyn qoımaq.

 «Erık Gomes Tom Lefflermen kelissózder júrgizýde. Qazirgi kezde «Kanelo» 168 fýntqa kóterildi, túsiniksiz sebeptermen Golovkın olaı eshqashan jasaǵysy kelmegen. Eger 15 jeltoqsanda «Kanelo» jeńiske jetse, ol ortasha salmaqqa qaıta oralyp, úzdiktermen qaıta aıqasatyn bolady. Al Golovkın aıqasqysy kelse, oǵan usynylatyn tıisti soma bar. Eger ol aıqasqysy kelmese, onda biz basqa bireýmen bokstastyratyn bolamyz. Men Golovkınǵa qandaı soma usynatynymyzdy aıta almaımyn, biraq «Kanelo» qazirgi usynysqa óte rıza. Golovkın, óz isterińdi atqara ber, daıyn bolǵanda,esigimizdi qaǵarsyń, biz de saǵan daıyn bolamyz», -  dedi De la Hoııa Fight Hub-qa bergen suhbatynda.

Eske sala keteıik,  «Kanelo» 15 qyrkúıek kúni qazaqstandyq boksshy Gennadıı Golovkınmen (38-1-1, 34 KO) ótken revanshtyq aıqasta jeńiske jetti. 

Golovkın men «Kanelonyń» alǵashqy jekpe-jegi 2017 jyldyń 16 qyrkúıeginde Las-Vegasta ótti. Aıqas tóreshilerdiń sheshimimen teń aıaqtaldy.  

Gennadıı úshinshi aıqasqa da kelisimin berdi. Biraq Alvarestiń komandasy ony uıymdastyrýǵa asyǵyp otyrǵan joq. Saýl Alvarestiń kelesi jekpe-jegi 15 jeltoqsanda Nıý-Iork qalasynda ótedi. Onyń qarsylasy  WBA Super nusqasy boıynsha ekinshi orta salmaqtaǵy chempıon Rokkı Fıldıng (27-1, 15 KO) bolmaq.