«Kanelonyń» kelesi aıqasy kimmen jáne qashan ótetini resmı málimdeldi

NUR-SULTAN. QazAqparat – Meksıkalyq Saýl Alvarestiń (53-1-2, 36 KO) jattyqtyrýshysy Eddı Reınoso boksshynyń kelesi jekpe-jegi kimmen jáne qashan ótetinin aıtty, dep habarlaıdy QazAqparat Sports.kz saıtyna silteme jasap.

«Kanelonyń» qarsylasy – WBO nusqasy boıynsha sýper orta salmaqtaǵy álem chempıony, brıtandyq Bıllı Djo Sonders (29-0, 14 KO). Jekpe-jek meksıkalyq Sınko de maıo merekesine oraı uıymdastyrylady.

«Kanelo» óziniń kelesi kezdesýin 2 mamyrda ótkizedi. Biz Sonderspen aıqasatyn bolamyz. Jekpe-jek Las-Vegasta bolady», — dep málimdedi Reınoso.

Aıta keteıik, qyrkúıek aıynda Alvares qazaqstandyq Gennadıı Golovkınmen (40-1-1, 35 KO) úshinshi ret judyryqtasady dep kútilýde.