«Kanelonyń» kelesi aıqasy qashan ótetini belgili boldy

NUR-SULTAN. QazAqparat – Eki salmaq dárejesindegi álem chempıony Saýl «Kanelo» Alvarestiń múddesin qorǵaıtyn «Golden Boy» promoýterlik kompanııasynyń prezıdenti Erık Gomes ulttyq Sınko de Maıo merekesi aldyndaǵy meksıkalyqtyń josparymen bólisti, dep habarlaıdy QazAqparat tilshisi Sports.kz saıtyna silteme jasap.

«Kanelonyń» kelesi aıqasynyń 2 mamyrda ótetini josparlanyp otyr. Meksıkalyqtyń qarsylasynyń kim ekeni ázirge beımálim. Osy aıda Gomes boksshymen kezdesip, aldaǵy aıqastyń mán-jaıyn talqylamaq.

Boksshynyń qaı salmaq dárejesinde sharshy alańǵa shyǵatyny da aıtylmady. Boljamǵa saı, Saýl Alvares ekinshi orta salmaqta óner kórsetýi múmkin. Alaıda orta salmaq pen jartylaı orta salmaqta da shyǵyp qalýy múmkin degen tuspal bar.

Aıta ketsek, 2 qarashada «Kanelo» jartylaı orta salmaqta WBO nusqasy boıynsha álem chempıony beldigi úshin reseılik Sergeı Kovalevpen shyǵyp, ony nokaýtqa túsirgen edi. Alaıda kóp ótpeı boksshy bul tıtýldan bas tartty. Aıta keterligi, orta salmaqta qazaqstandyq chempıon Gennadıı Golovkın Alvarespen úshinshi aıqasqa shyǵýǵa nıet bildirgen bolatyn.