«Kanelonyń» bapkerleri Golovkınmen qarymta kezdesýge qurǵan josparlaryn málim etti

ASTANA. QazAqparat - Burynǵy álem chempıony, meksıkalyq Saýl Alvarestiń (49-1-2, 34 KO) bapkerleri Eddı jáne Chepo Reınosolar Gennadıı Golovkınge (38-0-1, 34 KO) qarsy ekinshi jekpe-jekte jeńiske jetý úshin ne isteý kerek ekendigin aıtty, dep habarlaıdy «SPORTINFORM» SAA vringe.com-ǵa silteme jasap.

«Alǵashqy kezdesýde «Kanelo» jaqsy judyryqtasty, ol qorǵana júrip, tamasha jekpe-jek ótkizdi. Árıne, ol kóbirek soqqy berýi tıis edi. Biraq men sol kezdesýde jeńiske jetken edik dep oılaımyn. Endi aldaǵy jekpe-jekte aıqyn jeńiske jetý úshin Saýl kóbirek soqqy berýi tıis. Biz birinshi kezdesýdi muqııat taldap shyqtyq, sonyń negizinde jumys istep jatyrmyz. 15 qyrkúıekte úırengenimizdi kórsete otyryp, jeńiske jetemiz dep oılaımyn», deıdi bapker Eddı.

Meksıkalyq boksshynyń ekinshi bapkeri Cheponyń aıtýynsha, birinshi kezdesýde «Kanelo» Golovkındi kóbirek qatelesýge májbúrlegen.

«Men birinshi jekpe-jekti kóp márte qarap shyqtym. Saýl qorǵana júrip aıqasýdyń tamasha úlgisin kórsetip, jeńiske jetti dep oılaımyn. Ol denesimen utymdy qımyldap, Golovkındi qatelesýge májbúrledi. Saýl endigide jıirek soqqy berse bolǵany, basqa másele qalǵan joq. Osy joly biz aıtqandaı bolady dep úmittenemiz», - deıdi ol.