«Kanelonyń» bapkeri: 2020 jyly Alvares Golovkınmen kezdesýi múmkin

NUR-SULTAN. QazAqparat – Meksıkalyq boksshy Saýl Alvarestiń bapkeri Eddı Reınoso «Kanelonyń» kelesi jyldyń mamyryndaǵy aıqasqa shyǵýy yqtımal qarsylastardyń tizimine qazaqstandyq álem chempıony Gennadıı Golovkındi engizdi. Bul týraly The Athletic bedeldi ınsaıderi Lens Pagmaır Twitter-degi paraqshasynda jazdy, dep habarlaıdy QazAqparat Sports.kz saıtyna silteme jasap.

«Eddı Reınoso «Kanelonyń» mamyrda ótetin aıqasyna birneshe boksshynyń qarsylas retinde qarastyrylyp jatqanyn aıtty. Bul tizimge Gennadıı Golovkındi qosqan, sondaı-aq olardyń arasynda Djermalla Charlo men Bıllı Djo Sonders bar. Budan bólek, ol «Kanelo» jeńiske jetip jatsa, Beterbıevpen aıqasýǵa qarsy emestigin málim etti», - dep jazdy Pagmaır.

Eske salaıyq, 2 qarashada «Kanelo» reseılik Sergeı Kovalevpen kezdesedi.

Budan buryn Golovkınniń rıngke kelesi jyldyń aqpanynda oralatyny josparlanyp otyrǵany habarlandy. Alaıda, «Kanelomen» úshinshi jekpe-jek uıymdastyrylatyn bolsa, ol mamyrǵa deıin kútýge daıyn.