«Kanelo» jekpe-jekten bas tartqan jaǵdaıda Golovkın qandaı qadam jasaıdy

NUR-SULTAN. QazAqparat - WBA Super, WBC, IBF jáne IBO nusqalary boıynsha ortasha salmaqtaǵy álemniń burynǵy chempıony Gennadıı Golovkın (39-1-1, 35 KO) jańa promoýteri Eddı Hırnniń usynysymen Saýl Alvares (52-1-2, 35 KO) trılogııadan bas tartqan jaǵdaıda júzege asyrylatyn naqty is-qımyl josparyn aldy, dep habarlaıdy QazAqparat Sports.kz-ke silteme jasap.

Golovkın de, Hırn de «Kanelomen» trılogııa ótkizýge nıetti ekeni belgili, alaıda ekeýi meksıkalyq boksshynyń GGG-men múlde rıngke shyqqysy kelmeıtindeı jaǵdaı ornaǵanda júzege asyrylatyn «B» josparyn ázirleýdi sheshti. Osylaısha promoýteri Golovkınge naqty aıqasatyn tórt qarsylasty usyndy. Qatarynda Demetrıýs Andrade (28-0, 17 KO, ortasha salmaqtaǵy WBO chempıony), Bıllı Djo Sonders (28-0, 13 KO, sýper ortasha salmaqtaǵy WBO chempıony), Kallým Smıt (26-0, 19 KO, sýper ortasha salmaqtaǵy WBA Super chempıony) jáne Denıel Djeıkobs (35-3, 29 KO) bar. Olardyń úsheýi álem chempıony tıtýldaryna ıe. Golovkın men «Kanelo» arasyndaǵy alǵashqy jekpe-jek teń aıaqtalsa, ekinshisinde Alvares tóreshilerdiń basym kópshiliginiń daýysymen jeńimpaz atanǵan edi.