«Kanelo» Meksıkada Djon Raıderdi jeńdi

GVADALAHARA. QazAqparat – Gvadalaharadaǵy (Meksıka) Estadio Akron arenasynda boks keshiniń negizgi jekpe-jegi ótti.

Jergilikti juldyz Saýl «Kanelo» Alvares (58-2-2, 39 KO) brıtandyq Djon Raıderge (32-5, 18 KO) qarsy shyqty, dep habarlaıdy QazAqparat Sports.kz portalyna silteme jasap.

Báske sýperorta salmaqtaǵy álemniń absolıýt chempıony ataǵy qoıyldy. «Kanelo» barlyq tıtýlyn (WBA Super, WBC, WBO jáne IBF) báske tikti. Jekpe-jek on eki raýndqa josparlanǵan bolatyn, kútpegen jerden raýnd tolyq aıaqtalyp, tóreshilerdiń biraýyz sheshimimen meksıkalyq boksshy jeńimpaz atandy.

Besinshi jáne segizinshi raýndtarda Raıder nokdaýnǵa túsip qap, murnyn jaraqattap aldy. Osylaısha, «Kanelo» kásipqoı bokstaǵy 59-shy jeńisine qol jetkizse, Djon altynshy ret jeńildi.

Byltyr qyrkúıekte Saýl Alvares tóreshilerdiń biraýyz sheshimimen qazaqstandyq boksshy Gennadıı Golovkınnen (42-2-1, 37 KO) basym túsken bolatyn.

Sapopandaǵy (Meksıka) boks keshinde Saýl «Kanelo» Alvares anderkardynda qazaqstandyq boksshy Ábilhan Amanqul (3-0, 3 KO) rıngke shyqqan. Ábilhan Amanqul meksıkalyq Fabıan Rıos Fraýstony nokaýtqa jiberdi.