«Kanelo» qyrýar aqsha taýyp júr, sondyqtan Golovkınmen judyryqtasýǵa asyqpaıdy - Smıt
ASTANA. QazAqparat - Álemniń birinshi orta salmaqtaǵy eks-chempıony ulybrıtanııalyq Lıam Smıt burynǵy qarsylasy Saýl "Kanelo" Alvares qazaqstandyq Gennadıı Golovkınmen judyryqtasýdan qashyp júrgenin aıtty, dep habarlaıdy Vesti.kz saıtynyń qazaq bólimi.
"Kanelo" jaǵdaıyn jaqsartyp alǵan ýaqytqa deıin Golovkınnen qashady. Onyń aqyldy boksshy ekeni belgili. Ýaqyt ótip jatyr, al Golovkınniń jasyna jas qosylyp jatyr. "Kanelo" neǵurlym uzaq kútse, jekpe-jekte jeńiske jetý múmkindigi soǵurlym artady. Golovkın boksshy retinde myqty, biraq, "Kanelonyń" dańqy basymyraq. Qazir ol aqsha taýyp júr. Sondyqtan asyqpaıdy (Golovkınmen judyryqtasýǵa - red.)", - deıdi Smıt Behind The Gloves basylymyna bergen suhbatynda.
Eske salaıyq, Smıt jáne "Kanelo" 2016 jyly sharshy alańda jolyǵyp, ulybrıtanııalyq boksshy nokaýtqa túsken bolatyn. Osylaısha, Smıt WBO belbeýinen aıyrylǵan edi.
Mamyr aıynda Ámir Handy jeńgennen keıin "Kanelo" rıng mańynda otyrǵan Golovkındi eldiń kózinshe "judyryqtasýǵa" shaqyrǵan edi. Al jekpe-jekten keıingi baspasóz máslıhaty kezinde qazaqstandyq boksshymen jekpe-jek ótkizýden qoryqpaıtynyn jáne kúz aıynda judyryqtasýǵa daıyn ekenin aıtqan. Alaıda birneshe kúnnen keıin meksıkalyq boksshy WBC belbeýinen bas tartyp, birinshi orta salmaqqa aýysyp ketken bolatyn.
