«Kanelo» qazaqstandyqtardy Naýryz meıramymen quttyqtady

NUR-SULTAN. QazAqparat - Meksıkalyq boksshy Saýl Alvares Qazaqstan halqyn Naýryz merekesimen quttyqtady, dep habarlaıdy QazAqparat.

Sportshynyń quttyqtaý lebizin Suleimen Promotions kásibı sport komandasy jelide jarııalady.

- Qazaqstan halqy, Naýryz qutty bolsyn! Bar jaqsylyqty tileımin, - deıdi «Kanelo» vıdeoda.

Aıta keteıik, Saýl Alvares — birneshe salmaqta óner kórsetetin meksıkalyq kásipqoı boksshy. The Ring jýrnalynyń tańdaýy boıynsha úzdik boksshy jáne jyl boksshysy atanǵan.

Kásipqoılar arasynda ekinshi orta salmaqta absolıýtti álem chempıony, jartylaı orta salmaqta WBC nusqasy boıynsha jastar arasyndaǵy álem chempıony, WBC, WBA, WBO jáne The Ring tujyrymdary boıynsha jartylaı orta salmaqtaǵy álem chempıony, WBC, WBA Super, IBF jáne The Ring tujyrymdary boıynsha orta salmaqtaǵy álem chempıony.

Jalpy, búkil mansabynda álem chempıony ataǵy úshin 20 boksshyny jeńgen.

Ol 2017 jyly qazaqstandyq boksshy Gennadıı Golovkınmen jekpe-jekke shyǵyp, aıqas teń aıaqtaldy. Týra bir jyldan keıin ótken qarymta kezdesýde tóreshilerdiń basym bóliginiń sheshimimen «Kanelo» jeńiske jetti.