«Kanelo» Golovkınniń barlyq tıtýldaryn tartyp almaq

ASTANA. QazAqparat - Meksıkalyq boksshy Saýl Alvarestiń (49-1-2, 34 KO) promoýteri Oskar de la Hoııa «Kanelonyń» kelesi josparlaryn aıtty, dep habarlaıdy Sports.kz.

Sońǵy kezderi «Kanelo» men Gennadıı Golovkın (38-0-1, 34 KO) arasyndaǵy ekinshi aıqastyń jeńimpazy osy jekpe-jektiń anderkartynda judyryqtasatyn Davıd Leme (39-4, 33 KO) jáne Gerı O'Sallıvan (28-2, 20 KO) jubynyń jeńimpazyna qarsy rıngke shyǵady degen sybys tarap ketti. Biraq «Kanelonyń» promoýteri buǵan eshkim kepil bola almaıtynyn jetkizdi.

«Eshqandaı kepildik joq. Barlyǵy da boksshylardyń ózderine, olardyń jekpe-jegi qanshalyqty jemisti bolýyna baılanysty. Eger O'Sallıvan nemese Leme jaqsy judyryqtassa, olar ózderine nazar aýdartýy múmkin. Biraq men Alvares zor ambıtsııaly jospar quryp otyrǵanyn aıtqym keledi. Ol aldymen Golovkınniń tıtýldaryn tartyp alyp, dıvızıondaǵy beldikterdi qosý úshin jekpe-jek ótkizýge nıetti. Ol úzdiktermen aıqasqysy keledi. Biraq qaıtalap aıtamyn, kóp nárse Leme men O'Sallıvannyń ózderine baılanysty», - deıdi De la Hoııa.