Charlomen jekpe-jek: Alvares absolıýtti chempıon ataǵyn úshinshi ret qorǵap qaldy

Meksıkalyq Saýl Alvares Amerıka ókili Djermell Charlony jeńip, álemniń absolıýtti chempıony ataǵyn úshinshi ret qorǵap qaldy. QazAqparat bul týraly «Shredınger sporty» Telegram-arnasyna silteme jasap habarlaıdy.

Boks tarıhynda alǵash ret álemniń eki absolıýtti chempıony arasynda jekpe-jek ótti. «Kanelo» ekinshi orta salmaqta tórt beldiktiń ıegeri, al Charloǵa birinshi orta salmaqtaǵy WBA, WBC, WBO jáne IBF tıtýldary tıesili.

Búgingi jekpe-jekte S.Alvareske tıesili tıtýldar báske tigildi. Sol úshin D.Charlo eki salmaq sanatyna kóterildi – 69,8 keliden 76,2 kelige deıin.

Kezdesý josparlanǵan barlyq 12 raýndqa jalǵasty jáne tóreshilerdiń biraýyzdy sheshimimen «Kanelonyń» paıdasyna aıaqtaldy. Jetinshi raýndta meksıkalyq boksshy qarsylasyn nokdaýnǵa jibergenimen, D.Charlo sońyna deıin berilmedi.

33 jastaǵy Saýl Alvares kásipqoı rıngte 60-shy ret (39 nokaýt) jeńiske jetip otyr. Mansabynda eki ret jeńilis taýyp, eki ret teń nátıje tirkelgen.

Djermell Charlonyń da jasy 33-te. Ol 2022 jyldyń 14 mamyrynan rıngke shyqpaǵan bolatyn. Bul kúni argentınalyq Braıan Kastanony nokaýtqa jiberip, birinshi orta salmaqtaǵy (69,8 kg) absolıýtti álem chempıony atandy. Charlo enshisinde – 35 jeńis (19 nokaýt), eki jeńilis, bir teń nátıje bar.

Eske salaıyq, Las-Vegasta ótken "Alvares-Charlo" aıqasynyń anderkardynda qazaqstandyq eki boksshy óner kórsetti. 

Bek Nurmaǵanbet (10-0, 8KO) nıgerııalyq Abımbola Osýndaırony (5-0, 3KO) nokaýtpen jeńdi. 

Al Ábilhan Amanquldyń (4-0-1, 4KO) amerıkalyq Djoshon Djeımspen (7-0-2, 4KO) kezdesýi teń upaımen aıaqtaldy.