«Kanelo» dopıng úshin jazadan qutylýy múmkin

ASTANA. QazAqparat - The Sweet Science jáne The Prizefighters úshin jazylǵan maqalalar avtory Davıd Avıla Sports.kz-ke bergen qysqa suhbatynda Saýl Alvareske dopıng qoldanǵany úshin qandaı jaza beriletini týraly pikirin bildirdi.

«Nevada shtatynyń Atletıka komıssııasy jaza belgilegen kúnniń ózinde, naqty mynadaı jaza beredi degen senim joq mende. Alvaresten aqpanda tyıym salynǵan zattyń izi tabylǵanmen, jýyrda ótken test onyń taza ekenin kórsetti. Bári de Atletıka komıssııasyna baılanysty. Buryn ol aralas jekpe-jek faıterinen úlken aıqas aldynda dopıng tabylsa da kezdesýge ruqsat bergen», - deıdi Avıla.

Eske sala keteıik, osy másele boıynsha sońǵy sheshim 18 sáýirde shyǵady. Biraq «Kanelo» 5 mamyrda Golovkınmen ótýi tıis jekpe-jekten resmı túrde bas tartyp úlgergen.