Kane Ýesttiń Reseıdegi kontsertteri ótpeıtini resmı rastaldy
ASTANA. KAZINFORM — Kane Ýesttiń kontsertterin uıymdastyrýshy Say Agency reperdiń 10 jáne 11 qazan kúnderi Sankt-Peterbýrgte ótýi tıis eki kontsertiniń toqtatylǵanyn resmı túrde rastady. Satyp alynǵan bıletterdiń aqshasyn 12 qazannan bastap qaıtarýǵa bolady, dep habarlaıdy Euronews.
Buǵan deıin reseılik BAQ kontsert uıymdastyrýshylaryna qatysty alaıaqtyq belgileri boıynsha tekserý júrgizilip jatqanyn habarlaǵan.
Sankt-Peterbýrgte kontsert ótetini týraly aqparat tamyz aıynyń ortasynda taraǵan. Uıymdastyrýshylardyń málimetinshe, sol kezde shamamen 100 myń bılet satylǵan.
Keıin Sankt-Peterbýrgtegi «Gazprom Arena» stadıonynyń ákimshiligi reperdiń kontsertterin qabyldamaıtynyn málimdedi. Oǵan jalǵa alý týraly kelisimshartqa qol qoıylmaǵanyn sebep retinde keltirgen. Alaıda is-sharany uıymdastyrýshy bul málimdemege qarsylyq bildirdi.
Endi Say Agency eki kontserttiń de toqtatylǵanyn resmı túrde rastady. Alaıda promoýter kontsertterdiń ne sebepti toqtatylǵanyn naqtylamady. Kompanııa jankúıerlerge «jobanyń mártebesi men aldaǵy josparlary» týraly qosymsha aqparat beretinin aıtty.
Uıymdastyrýshylar bıletterdiń aqshasyn 12 qazannan bastap qaıtarýǵa ýáde berdi.
Aıta keteıik, Kane Ýesttiń kontserti Almatyǵa 5 mlrd teńge paıda ákeldi. Almaty qalasy týrızm basqarmasynyń málimetinshe, aýqymdy kontsertke baılanysty stadıonda 31 myń kórermen jınaldy. Oǵan 50-den astam elden shamamen 7 700 týrıst kelgen. Olardyń 2 myńǵa jýyǵy kontsertke arnaıy kelgen sheteldik jankúıerler.
