Kane Ýesttiń Ortalyq stadıondaǵy kontserti «Qaıratpen» kelisilmegen — klýb málimdeme jasady
ASTANA.KAZINFORM — «Qaırat» fýtbol klýby amerıkalyq reper Kane Ýesttiń Almatydaǵy kontsertiniń uıymdastyrýshylary kontsert kúnin olarmen kelispegenin málimdedi.
Klýbtyń málimetinshe, «Qaırat» Ortalyq stadıonda óz alańyndaǵy matchtaryn ótkizýdi jalǵastyryp jatyr jáne Eýrokýbok jarystaryna qatysyp jatyr.
– Buǵan deıin kópshilikke Kane Ýesttiń 14 tamyzda Almatynyń Ortalyq stadıonynda kontsert ótkizetini týraly aqparat tarady. «Qaırat» fýtbol klýby bul kúnniń klýbpen kelisilmegenin resmı túrde málimdeıdi. Klýb Ortalyq stadıonda óz alańyndaǵy oıyndaryn ótkizedi jáne Eýrokýboktaǵy jarysyn jalǵastyryp jatyr, – delingen habarlamada.
Qazaqstan Premer-lıgasynyń kúntizbesine sáıkes, «Qaırat» 8 jáne 15 tamyzda Ortalyq stadıonda el chempıonaty aıasyndaǵy óz alańyndaǵy matchtaryn ótkizýi tıis. Sonymen qatar, 11–13 tamyz aralyǵynda klýbtyń Eýrokýboktaǵy óz alańyndaǵy kezdesýi ótýi múmkin.
Klýb fýtbolshylardyń óte tyǵyz oıyn kestesine jáne stadıondaǵy kógaldyń búliný qaýpine nazar aýdardy.
– Mundaı aýqymdy kontsertti ótkizý sahna men tehnıkalyq jabdyqtardy uzaq ýaqyt boıy ornatyp, keıin bólshekteýdi talap etedi. Bul fýtbol alańy men stadıon ınfraqurylymyna edáýir salmaq túsiredi. Tyǵyz sporttyq kúntizbe jaǵdaıynda bul kógal sapasyna, arenany daıyndaýǵa jáne resmı matchtardy belgilengen talaptarǵa saı ótkizýge keri áser etýi múmkin, – dep málimdedi klýb.
«Qaırat» Ortalyq stadıonda kez kelgen buqaralyq is-sharany ótkizý fýtbol kúntizbesi eskerilip, barlyq múddeli taraptarmen kelisilgennen keıin ǵana uıymdastyrylýy tıis ekenin atap ótti.
– Tıisti kelisimder aıaqtalǵanǵa deıin Ortalyq stadıondy 14 tamyzdaǵy kontsert ótetin oryn retinde jarııalaý erte dep sanaımyz, – dedi klýb.
Esterińizge sala keteıik, buǵan deıin Kane Ýesttiń Almatydaǵy kontserti 14 tamyzǵa josparlanǵany, uıymdastyrýshylar bılet satýdy osy dúısenbi, 20 shildeden bastaıtyny habarlanǵan bolatyn.
