Kane Ýestiń Almatydaǵy kontserti qalaı ótti
ASTANA. KAZINFORM —Almatyda YE degen atpen óner kórsetetin amerıkalyq reper ári mýzykalyq prodıýser Kane Ýestiń kontserti ótti.
Aýqymdy shoý ońtústik astananyń Ortalyq stadıonynda uıymdastyryldy.
Kontsert saǵat 21:00-de bastaldy. Al stadıon kórermender úshin 16:00-de ashyldy.
Shoý áserli ótti: kórermender ánshige qosylyp án aıtyp, bılep, bolyp jatqan oqıǵalardy beınejazbaǵa túsirdi. Kontsert barysynda aspanǵa birneshe ret otshashý atylyp, bul shoýdyń jarqyn elementteriniń birine aınaldy.
Shoýdyń basty ereksheligi – stadıonnyń ortasyna ornatylǵan alyp shar tárizdi qurylym boldy. Kane Ýest dál osy qurylymnyń ústinde qaýipsizdik arqanynyń kómegimen óner kórsetti.
Kontsertti ótkizý úshin Almatyǵa 100 tonnadan astam tehnıkalyq jabdyq jetkizildi. Kórermenderge sahna, shar tárizdi qurylym jáne pırotehnıkalyq áserler qoldanylǵan shoý usynyldy.
Alańnyń perımetri boıynsha jaryqtandyrý jabdyqtaryna arnalǵan bıik tehnıkalyq munaralar da ornatyldy.
Kórermenderdiń kirýi úshin Ortalyq stadıonnyń úsh jaǵynan 40 kireberis qarastyryldy.
Aýmaqqa kirer aldynda tekserý júrgizildi. Іshke tek bıletpen kirýge ruqsat etildi.
Kontsert ótetin kúni polıtsııa stadıon aýmaǵy men oǵan irgeles kóshelerdegi patrýldik qyzmetti kúsheıtti.
Uıymdastyrýshylar kórermenderge qarý, esirtki, alkogol, shyny ydys, plastık bótelkeler, kesetin jáne tesetin zattar men basqa da tyıym salynǵan zattardy alyp kirýge bolmaıtynyn aldyn ala eskertti.
Aýmaqta jedel medıtsınalyq járdem brıgadalary men órt sóndirý jasaqtary da kezekshilik etti. Medıtsınalyq qyzmetkerler stadıon mańynda bolyp, qajet bolǵan jaǵdaıda kórermenderge kómek kórsetýge daıyn turdy.
Kontsertke baılanysty saǵat 16:00-den 00:00-ge deıin Abaı dańǵylynyń, Sátbaev jáne Baıtýrsynov kósheleriniń jekelegen ýchaskelerinde kólik qozǵalysy men avtokólik qoıýǵa shekteý qoıyldy.
Qoǵamdyq kóliktiń 32 baǵytynyń qozǵalys syzbasy ózgerdi.
Kontsert aıaqtalǵannan keıin kórermender úshin alty baǵyt boıynsha 60 tegin avtobýs uıymdastyryldy. Avtobýstar Ortalyq stadıonnan «Almaty Arenaǵa», «Alataý» metro stantsııasyna, Almaty-1 temirjol vokzalyna, «Orbıta» shaǵynaýdanyna, «Juldyz» shaǵynaýdanyna jáne Almaty halyqaralyq áýejaıyna qatynady.
Metronyń jumys ýaqyty da uzartyldy. Metropolıten túngi saǵat 01:00-ge deıin jumys istedi.
Eske salaıyq, YE kontserti bastapqyda 14 tamyzda ótýi kerek bolǵan. Alaıda qatty jel men nóser jańbyr saldarynan sahnalyq qurylymdardyń keıbir elementteri zaqymdalyp, kontsert 15 tamyzǵa aýystyryldy.
Buǵan deıin Almatyda álemge áıgili Kane Ýestiń kontsertine daıyndyq qalaı júrip jatqany týraly jazǵan bolatynbyz.
