Kane Ýest pen mýmııa: kreatıvti qazaqstandyqtar da óz tańdaýyn jasady
AQTÓBE. KAZINFORM – Qazaqstandyqtar túrli keıipke enip, óz tańdaýyn jasap jatyr. Olardyń bir toby áleýmettik jeli obrazyn tańdasa, endi biri tanymal tulǵalardyń beınesinde kórindi. Kazinform erekshe obrazdardy iriktedi.
Kreatıvti qazaqstandyqtar Quryltaı saılaýyna erekshe daıyndaldy. Kóshiler jınalyp, aq jaýlyqty ájeler bir sátte tańdaýyn jasady. Endi biri saılaý ýchaskesine kók traktorǵa minip bardy.
BQO Aqjaıyq aýdany Qaraýyltóbe aýyldyq kitaphanasyndaǵy № 43 saılaý ýchaskesinde óz tańdaýyn jasaǵan turǵyn kóptiń qyzyǵýshylyǵyn týǵyzdy. Dámet Ótegenova kishkentaıynan eńbek etip, uzaq jyldar boıy aýyl sharýashylyǵy salasynda jumys istegen. Bir kezderi aýdandyq máslıhat depýtaty bolǵan zeınetker elimizdiń qoǵamdyq-saıası ómirinde taǵy da belsendiligin tanytty.
Al Soltústik Qazaqstanda qalyńdyq kóılegin kıgen turǵyndar daýys berýge birge bardy.
Sonymen birge osy oblystaǵy Jambyl aýdany Presnovka aýylyndaǵy № 164 saılaý ýchaskesine «Arman-aı» vokaldyq tobynyń músheleri de óz tańdaýyn jasady.
— Biz saılaýǵa barlyǵymyz birge keleıik dep sheshtik. Bul — biz úshin mańyzdy ári tarıhı kún. Búgin biz alǵash ret bir palataly Quryltaı depýtattaryn saılap jatyrmyz, — dedi top jetekshisi Aınagúl Sarymsaqova.
Almatylyq bolsa saılaý ýchaskesine Kane Ýest beınesinde keldi. Ol Bostandyq aýdanyndaǵy № 608 saılaý ýchaskesinde óz azamattyq boryshyn ótedi.
Ánshiniń bet-beınesi dál somdalǵan betperde kópshiliktiń qyzyǵýshylyǵyn týdyrdy.
Al Aqtóbede «mýmııa» keıpine engen adam óz tańdaýyn jasady. Ol № 9 mektep gımnazııasynda ornalasqan № 27 saılaý ýchaskesinde daýys berdi.
— Saılaýǵa erekshe obrazda kelip, óz tańdaýymdy jasadym. «Mýmııa» keıpinde kelip, kópshilikke az da bolsa kóterińki kóńil-kúı syılaǵanyma qýanyshtymyn. Meniń oıymsha erekshe bastamalar qoǵamdyq sharaǵa degen qyzyǵýshylyqty artyra túsedi, — dedi qala turǵyny.
Aqtóbede taǵy bir toby «Madagaskar» mýltfılmi keıipkerleriniń keıpine endi.
Quryltaı saılaýy kezinde Instagram, Threads, TikTok jáne Facebook áleýmettik jelisin beınelegen almatylyqtar da belsendilik tanytty. Olar Áýezov aýdanyndaǵy № 175 saılaý ýchaskesine bardy.
Atyraýlyq tańda kofe beınesinde tańdaý jasady.
Al aq halat kıip, basyna súlgi oraǵan astanalyq bolsa saılaý ýchaskesine robotpen qatar kirdi. Ekeýi № 132 saılaý ýchaskesinde tańdaýyn jasady.
Bul tizimge Balqashtaǵy jolbarysty, Shyǵys Qazaqstandaǵy súńgýirdi de qosýǵa bolady. Jelide súńgýirdiń ózennen shyǵyp, tańdaý jasaǵan sáti jarııalandy.
Sondaı-aq Pavlodar oblysynda «Kartop otbasy» daýys berdi.
Buǵan deıin habarlaǵanymyzdaı, Almaty oblysynda parashıýtshi ushaqtan sekirip, daýys berý ýchaskesine tústi.
Atyraýlyq rekordsmen saılaý ýchaskesi aldynda júk kóligin súırep bardy.
