Kane Ýest kontserti: «Qaırattyń» eýrokýboktaǵy kelesi oıyny Túrkistanda ótedi
ALMATY. KAZINFORM — «Qaırat» fýtbol klýby eýrokýbok matchyn qabyldaıtyn alańy aýysatynyn habarlady.
Klýb málimetinshe, 14 tamyz kúni Almaty qalasynyń Ortalyq stadıonynda Kane Ýest kontserti ótetindikten, «Qaırattyń» negizgi alańy eýrokýboktyń úshinshi irikteý kezeńindegi oıyndy ótkizýge qoljetimsiz bolady.
— Qalyptasqan jaǵdaı men eýrokýbok kúntizbesiniń tyǵyzdyǵyn eskere otyryp, klýb ÝEFA-ǵa úshinshi irikteý kezeńindegi yqtımal óz alańyndaǵy matchtyń ótetin ornyn aýystyrý týraly ótinish joldady. Ótinish qaralǵannan keıin kezdesýdi Túrkistan qalasyndaǵy «Túrkistan Arena» stadıonynda ótkizýge kelisim berildi, — dep habarlady klýb.
Matchtyń naqty kúni men bastalý ýaqyty, sondaı-aq bılet satylymynyń bastalýy týraly aqparat komandanyń eýrokýboktaǵy aldaǵy kezeńi anyqtalǵannan keıin qosymsha jarııalanady.
Eske salaıyq, buǵan deıin 14 tamyz kúni saǵat 21:00–de Almaty ortalyq stadıonynda Kane Ýest kontserti ótetini belgili boldy.
Keıin «Qaırat» bul másele klýbpen kelisilmegenin habarlady.
