Qandyaǵashta 26 jastaǵy boıjetken ózin tonap ketti dep ákesine ótirik aıtqan
QANDYAǴASh. QazAqparat - Aqtóbe oblysy Qandyaǵash qalasynyń turǵyny jalǵan málimet bergeni úshin jazalanady, dep habarlaıdy QazAqparat tilshisi.
Qandyaǵash qalasynyń 26 jastaǵy turǵyny polıtsııaǵa aryz túsirdi. Ol kóshede ózin belgisiz bireýlerdiń tonap ketkenin aıtyp, aryzdandy.
«Velosıpedpen kele jatyp, sómkesin ashyq túrde urlap ketkenin aıtty. Jalpy shyǵyny 10 myń teńgeni qurady. Tergeý barysynda tonaý faktisi bolmaǵany jáne ony ózi oılap tapqany anyqtaldy. Sol keshte ol jumystan shyǵyp, bir tanysymen kezdesken. Kólikte aıaq astynan janjal shyǵyp, er adam qyz balany betinen uryp jibergen. Ol ashýlanyp, kólikten túsip, sómkesin alýdy umytyp ketken. Úıge sómkesiz oralǵan qyz ákesine oǵan belgisiz bireýdiń shabýyl jasap, tonap ketkenin aıtqan. Ákesi polıtsııaǵa júgindi», - deıdi oblystyq PD baspasóz qyzmetiniń jetekshisi Erbolat Sarqulov.
Aqparat jalǵan bolyp shyqty. Qazirgi ýaqytta is toqtatyldy. Al jalǵan aqparat berý faktisi boıynsha qyzǵa qatysty sheshim qabyldanady.
