Qandyaǵash-Shalqar avtojolyn jóndeý jumystary bıyl bastalady

ASTANA. QazAqparat – Aqtóbe oblysynyń ákimi Eraly Toǵjanov ortalyq kommýnıkatsııalar qyzmetinde ótken brıfıngide «Qandyaǵash-Shalqar» avtojolynda jóndeý jumystary bıyl bastalatynyn málim etti, dep habarlaıdy QazAqparat tilshisi.

«Aqtóbe oblysy - óziniń geografııalyq ornalasýy jaǵynan tranzıttik áleýeti zor óńir. Degenmen, avtojoldardyń sapasyn jaqsartý ózekti bolyp otyr. Negizinen, oblysta jaqsy jáne qanaǵattanarlyq jaǵdaıdaǵy joldardyń úlesi 72% quraıdy. Byltyr 32 mlrd teńgege 536 shaqyrym jol jóndeldi. Aıta ketý kerek, byltyrmen salystyrǵanda bıyl 1,5 eseartyq qarajat qarastyryldy, 50,5 mlrd teńgege 848 shaqyrym jergilikti mańyzy bar avtojoldardy jóndeıtin bolamyz. Nátıjesinde, jyl aıaǵynda jaqsy jáne qanaǵattanarlyq jaǵdaıdaǵy jergilikti mańyzy bar joldardyń úlesi 78% bolady», - dedi oblys ákimi.

Sondaı-aq, ol 30 jyl boıy jóndeý kórmegen «Qandyaǵash-Shalqar» baǵytyndaǵy jolda jóndeý jumystary bıyl asbatalatynyn aıtty.

«Respýblıkalyq joldarǵa toqtalatyn bolsaq, Úkimet qoldaýymen uzyndyǵy 262 shaqyrym bolatyn «Aqtóbe – Ulǵaısyn» avtojolyn 4 jolaqqa keńeıtý arqyly 3-shi sanattan 1-shi sanatqa jetkizý josparda. Búgingi tańda atalǵan jobaǵa qajetti qujattama daıyn. Úkimetpen birlese qarjylandyrý máselesi qarastyrylyp jatyr. Sondaı-aq, 1960-70 jyldary salynǵan, shamamen 30 jyl boıy jóndeý kórmegen 260 shaqyrymdyq, aýyl turǵyndary úshin tarıhı mańyzy zor «Qandyaǵash-Shalqar» avtojolyn jóndeý jumysy bastalady», - dedi Eraly Toǵjanov.