Qandyaǵash kólik prokýrorlary 1,2 mln. teńgeden astam qarjy urlaý faktilerin anyqtady
AQTÓBE. 10 jeltoqsan. QazAqparat - Qandyaǵash kólik prokýrorlary «QTJ UK» AQ-nyń «Qandyaǵash jol dıstantsııasy» fılıalynyń jumysynda mazýt sińgen jer qyrtysyn shyǵarý jáne joıýǵa bólingen aqshalaı qarajattardy urlaý faktilerin anyqtady.
Prokýratýranyń baspasóz qyzmetinen habarlaǵandaı, jol dıstantsııasy qyzmeti men «NK Servıs» JShS-niń arasynda jasalǵan kelisim-shart boıynsha, sońǵysy Qandyaǵash stansasynyń temirjol tóseminen munaı ónimderimen lastalǵan jalpy salmaǵy 75 tonna jer qyrtysyn kómýdi júzege asyrady.
Kórsetilgen qyzmetter úshin Qandyaǵash jol dıstantsııasy «NK Servıs» JShS-ne 2 mln. astam teńge kólemindegi aqshalaı qarajattardy tóledi.
Alaıda, tekseris kórsetkendeı, Qandyaǵash jol dıstantsııasynyń jumyskerleri 45 tonnany joıý boıynsha oryndalǵan jumystardyń aktilerin jalǵan jasaǵan, osyǵan baılanysty «NK Servıs» JShS-ne 1,215 mln. teńge kólemindegi aushalaı qarajattar zańsyz aýdaryldy.
Atalǵan fakti boıynsha qylmystyq is qozǵaldy, aıyptaý ókim shyǵaryldy. «NK Servıs» JShS «QTJ UK» AQ-na 1 215 000 teńge kólemindegi somany tóledi.
