Kandıdattyń úgit materıaldaryn qasaqana zaqymdaǵan elordalyqqa aıyppul salyndy
«Sonymen qatar prezıdenttikke kandıdattyń biriniń úgit materıaldaryn qasaqana zaqymdaý faktisi anyqtaldy. Bul fakti boıynsha Nur-Sultan qalasynyń turǵynyna QR Ákimshilik quqyq buzýshylyq týraly kodesiniń 134-babymen 15 AEK kóleminde aıyppul salyndy», - dedi Bolat Dembaev QR Ortalyq saılaý komıssııasynyń otyrysynda.
Onyń dereginshe, sottarǵa saılaý boıynsha barlyǵy 11 ótinish túsken.
«Mysaly, kandıdat Á.Qosanovtyń shtabyndaǵy eńbek daýy boıynsha 1 adamnyń Qyzylorda oblystyq sotyna 3 ótinishi kelip tústi. Sot olardy qanaǵattandyrýdan bas tartty. Jalpy bıylǵy elektoraldyq kezeń quqyqtyq alańda ótip jatyr. Eger prokýratýraǵa túsken ótinishter týraly aıtatyn bolsaq, qazirgi ýaqytta olardyń sany 21-ge jetti. Onyń ishinde 13-i saılaý komıssııalarynyń quzyretine jatady. Basqa 8 ótinish boıynsha prokýrorlar kandıdattyń ózin-ózi usynýy jáne saılaýshyny tirkeý bóliginde túsindirme berdi», - dedi Bas prokýrordyń orynbasary.
