Kandıdattarǵa ýaqyt jetkilikti – sarapshy prezıdent saılaýy jaıynda

ASTANA. QazAqparat – Kezekten tys prezıdent saılaýyna qatysýǵa nıetti kandıdattardyń daıyndalýǵa ýaqyty jetkilikti. Mundaı pikirdi «Qazaqstandyq qoǵamdy damytý ınstıtýty» UAQ saraptama jáne ádistemelik qamtamasyz etý basqarmasynyń sarapshy-menedjeri Baýyrjan Serikbaev aıtty, dep habarlaıdy QazAqparat tilshisi.

«Memleket basshysy 1 qyrkúıektegi Qazaqstan halqyna Joldaýynda osy jyldyń kúzinde kezekten tys prezıdent saılaýy, al keler jyldyń birinshi jartyjyldyǵynda parlament saılaýy ótetinin aıtqan bolatyn. Osy turǵydan alǵanda prezıdent saılaýy da, parlament saılaýy da aldyn ala jarııa etildi. 1 qyrkúıekten bergi ýaqytta sarapshylar úshin de, saıasatkerler úshin de osy protsesti talqylap, daıyndyq júrgizýge tolyq múmkindik boldy. Sondyqtan menińshe, qazir óz kandıdatýrasyn usynatyn azamattar, belsendiler, saıasatkerler úshin daıyndalýǵa jaǵdaı jasaldy. Saılaý 20 qarashaǵa belgilendi. Oǵan deıin de áli eki aıdaı ýaqyt bar. Demek, ýaqyt jetkilikti», - dedi ol QazAqparat tilshisine telefon arqyly bergen suhbatynda.

Sonymen qatar sarapshy parlament saılaýy kelesi jyldyń birinshi jartyjyldyǵynda ótetininiń aldyn ala jarııalanýy da saıası partııalar úshin qazirden bastap daıyndalýǵa tolyq múmkindik beretindigin basa aıtty.

Foto: facebook.com/bauyrzhan.serikbayev