Kandıdattarǵa BAQ-ta teńdeı múmkindik berildi - Nurgúl Maýberlınova

NUR-SULTAN. QazAqparat - Búgin QR Ortalyq saılaý komıssııasynyń otyrysynda Qazaqstan Respýblıkasynyń Prezıdenttigine kandıdattar júrgizgen saılaý aldyndaǵy úgit qorytyndysy shyǵaryldy, dep habarlaıdy QazAqparat tilshisi.

QR Aqparat jáne qoǵamdyq damý vıtse-mınıstri Nurgúl Maýberlınova kandıdattardy qoldaý úshin saılaý aldyndaǵy úgit is-sharalary týraly aqparatty BAQ-ta baspa alańynyń, efır ýaqytynyń birdeı kóleminde taratý qorytyndysy týraly baıandady.

«Elektoraldyq naýqandy jazyp kórsetý boıynsha monıtorıngpen 820 buqaralyq aqparat quraly qamtyldy. Onyń ishinde: 17 respýblıkalyq telearna, 66 respýblıkalyq baspa basylymy, 30 óńirlik telearna, 519 óńirlik baspa basylymy, 30 radıo, 140-tan astam ınternet-resýrs. Monıtorıng qorytyndysyna sáıkes, búgingi kúni shamamen 16 myń aqparattyq materıal jaryq kórdi. Bul kezekten tys prezıdent saılaýyna azamattar men buqaralyq aqparat quraldary tarapynan qyzyǵýshylyqtyń joǵary ekendigin kórsetedi», - dedi ol.

Onyń aıtýynsha, BAQ-ta saılaýdyń uıymdastyrý-quqyqtyq aspektilerin halyqqa túsindirýge arnalǵan 5 myńǵa jýyq materıal jaryq kórdi. Respýblıkalyq deńgeıde zańnama talaptary tolyqtaı oryndaldy. 6 maýsymda kandıdattardyń qyzmeti jáne olardyń shtabtary týraly 11 myńnan astam materıal barlyq BAQ túrlerinde jarııalandy.