Kandıdattar arasynda qyzyq pikirsaıys bolady - sarapshy
«1 naýryzda jeti saıası partııa ókilderi arasynda saılaýaldy televızııalyq pikirsaıys ótti. Debat barysynda biraz emotsııa men qarsylastar arasyndaǵy básekelestik baıqaldy. Pikirsaıysqa qatysýshylar kórermenniń nazaryn barynsha aýdarýǵa tyrysty. Bul bir jaǵynan partııalarǵa saılaýda daýys jınaýyna jol ashsa, ekinshi jaǵynan, kandıdattardyń negizgi ıdeıalary men ustanymdarymen tanysý múmkindigi týdy. Ótken pikirtalas partııalardyń negizgi baǵyty men áleýmettik bazasyn taǵy bir ret kórsetti. Sonymen qatar daýys jınaý úshin kúreste olardyń negizgi qarsylastaryn anyqtady. Máselen, bıznes qoǵamdastyq pen aýyl saılaýshylarynyń daýysy úshin básekelestikti atap ótýge bolady», - dedi Ámına Úrpekova.
Onyń málimdeýinshe, debat barysynda partııa ókilderi áleýmettik, ekonomıkalyq kórsetkishterge basa nazar aýdara otyryp, sandar jáne derektermen jumys istegen.
Sarapshynyń aıtýynsha, bul belgili bir deńgeıde saılaýaldy daıyndyqty kórsetedi jáne 16 naýryzda budan da qyzyq pikirsaıys kútip tur.
«Bir mandatty okrýgter boıynsha aralas saılaý júıesine kóshý qazaqstandyqtardyń azamattyq, saıası belsendiligin kórsetýge aıtarlyqtaı serpin berdi. Osylaısha, 10 myńnan astam azamat Májilis pen máslıhattar depýtaty bolyp saılanýǵa óz quqyǵyn paıdalanyp otyr. Saıası synǵa túsýshilerdiń saılaý naýqanynda básekege qabilettiligi kóptegen faktorǵa baılanysty. Atap aıtqanda, kandıdattyń jáne onyń shtabynyń motıvatsııasy men kózqarasy, materıaldyq jáne adamı resýrstary, naýqanǵa daıyndyq deńgeıi, kreatıvi, shynaıylyǵy taǵy sol sııaqty. Memleket tarapynan BAQ-qa teń qoljetimdilikke kepildik beriledi. Ádildikti barynsha qamtamasyz etý úshin úgit-nasıhat máseleleri retteledi. Odan bólek, ár kandıdat saılaýaldy naýqan jumysy úshin memleketten teń soma alady», - deıdi ol.
Sondaı-aq, QSZI ókili zańnamalyq turǵydan barlyq kandıdattyń múmkindigi teń, al naýqannyń nátıjesi úmitkerlerdiń ózine baılanysty ekenin aıtty.
