Kandıdat J.Bázilbaev lıngvıstıkalyq komıssııanyń aldynda synaq tapsyrýdan bas tartty

ASTANA. QazAqparat - QR prezıdenttigine kandıdat Jaqsybaı Bázilbaev Ortalyq saılaý komıssııasynda lıngvıstıkalyq komıssııanyń aldynda synaq tapsyrýdan bas tartty.

Komıssııa aldyna kelgen J.Bázilbaev óziniń saıası málimdemesin jarııalaýdy bastap ketti.

Komıssııa tóraǵasy Myrzataı Joldasbekovtiń eskertýine qulaq aspaǵan J.Bázilbaev til bilimine synaq tapsyrýdan bas tartatyndyǵyn málim etti. «Men óz kandıdatýramdy saılaýdan alyp tastaýdy sheshtim», - dep atap ótti ol. Aıta keteıik, J.Bázilbaev osymen tórtinshi ret prezıdenttik saılaýǵa qatysýda. Bunyń aldynda ótken prezıdenttik saılaýda ol qazaq tilinen 10 qate jibergen bolatyn. Biraq soǵan qaramastan, ol memlekettik tildi jetik meńgergen dep tanyldy.