Qandyaǵashtaǵy jappaı ýlaný: meıramhana jumysy toqtatyldy
ASTANA. KAZINFORM – Aqtóbe oblysy Muǵaljar aýdandyq sanıtarııalyq-epıdemıologııalyq baqylaý basqarmasy qoǵamdyq tamaqtaný nysanynyń qyzmetin toptyq ýlaný tirkelgen kúni mán-jaılar anyqtalǵanǵa deıin ýaqytsha toqtatty.
Aldyn ala málimetter boıynsha, syrqattanǵan azamattar atalǵan meıramhanaǵa ártúrli sebeptermen (saltanatty is-sharalar, as berý jáne basqa da jıyndar) barǵan.
— Qazirgi ýaqytta saraptamamen qosa, epıdemıologııalyq tekserý jumystary júrgizilip jatyr. Tergep-tekserý aıasynda mamandar meıramhanadaǵy barlyq taǵam ónimderinen jáne qorshaǵan orta nysandarynan synamalar alyp, zerthanalyq zertteýge jiberdi, — delingen habarlamada.
Meıramhananyń qyzmeti jáne onda eńbek etken qyzmetkerler týraly aqparat tergeý áreketteriniń qupııalylyǵyna baılanysty jarııalaýǵa jatpaıdy.
Aqtóbe oblysy Densaýlyq saqtaý basqarmasynyń málimetinshe Muǵaljar aýdanynyń Qandyaǵash qalasyndaǵy «Tumar» meıramhanasyna barǵan azamattar arasynda ishek ınfektsııasy jaǵdaılarynyń tirkelýine baılanysty epıdemıologııalyq tekserý jalǵasyp jatyr.
— 23 maýsym saǵat 14:00–degi jaǵdaı boıynsha Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna ishek ınfektsııasynyń belgilerimen 113 naýqas medıtsınalyq kómekke júginip, aýrýhanaǵa jatqyzyldy. Atalǵan jaǵdaılar boıynsha sanıtarııalyq qyzmetke shuǵyl habarlamalar joldanyp, bakterıologııalyq zertteý júrgizý úshin synamalar alyndy.
Aýrýhanaǵa jatqyzylǵan naýqastardyń jaǵdaıy ortasha aýyrlyq dárejesinde, keıbir naýqastarda jaǵdaılarynyń jaqsarýy baıqalady. Qajetti medıtsınalyq kómek tolyq kólemde kórsetilip jatyr.
Medıtsınalyq uıymdarda qajetti tósek-oryn qory daıyndalyp, dárilik zattardyń jetkilikti qory qamtamasyz etildi.
Jaǵdaı turaqty baqylaýda.
Aıta ketelik Qandyaǵashta 100-den astam adam tamaqtan ýlanyp qalǵan edi. Osy oqıǵaǵa qatysty qylmystyq is qozǵalǵan edi.
