Memqyzmettegi reforma: shildeden bastap ne ózgeredi
PETROPAVL. KAZINFORM – Elimizde memlekettik qyzmet salasyn jańǵyrtýǵa baǵyttalǵan jańa zań memlekettik qyzmetshilerdiń mártebesi men eńbek jaǵdaıyna eleýli ózgerister engizbek.
Qazaqstan Respýblıkasynyń memlekettik qyzmeti týraly jańa Zańǵa Memleket basshysy 19 mamyrda qol qoıdy, qujat 1 shildeden bastap qoldanysqa enedi.
— Zańdaǵy negizgi jańashyldyqtardyń biri — eń aldymen, ol kásibı, ashyq ári azamattardyń múddesine baǵdarlanǵan memlekettik qyzmetti qalyptastyrýǵa baǵyttalǵan. Zańda ashyqtyq qaǵıdatyna erekshe nazar aýdarylǵan. Memlekettik qyzmetshiler óz quzyreti sheginde azamattar men uıymdardyń aqparatqa qol jetkizýin qamtamasyz etýge mindetti. Alaıda jeke derekterge qatysty málimetterdi bermeıdi. Sonymen birge azamattardyń ótinishterin qaraý merzimin negizsiz sozýǵa, aqparat berýden dálelsiz bas tartýǵa jáne jalǵan málimet usynýǵa tyıym salynady, — deıdi Memlekettik qyzmet isteri agenttiginiń SQO boıynsha departamentiniń bas mamany Darhan Ermekov.
Jańa zańda alǵash ret «memlekettik qyzmetshiniń minsiz bedeli» uǵymy engizildi. Ol qyzmetshiniń kásibı, adamgershilik jáne jeke qasıetteriniń jıyntyǵyn qamtyp, memlekettik qyzmetke kirý men ony atqarýǵa qoıylatyn talaptardy naqtylaıdy.
— Eńbek jaǵdaılaryna qatysty da birqatar ózgerister bar. Memlekettik qyzmetshilerge tolyq emes jumys ýaqyty rejımin qoldaný múmkindigi berilip, ıkemdi jumys kestesin engizýge quqyqtyq negiz jasaldy. Áleýmettik kepildikter de aıtarlyqtaı keńeıtildi. Burynǵy 30 kúntizbelik kúndik jyl saıynǵy eńbek demalysyna qosymsha, memlekettik qyzmet ótili 10 jyldan asqan qyzmetshilerge eńbek ótiline qaraı 3-ten 10 kúnge deıin qosymsha demalys beriledi. Sonymen qatar neke qııý, bala týý, bala asyrap alý, jaqyn týystarynyń qaıtys bolýy sııaqty jaǵdaılarda 10 kúnge deıin qysqa merzimdi aqyly demalys qarastyrylǵan, — deıdi Darhan Ermekov.
Mamannyń aıtýynsha, tártiptik jaýapkershilik júıesi de jetildirildi. Jańa redaktsııada tártiptik jazalardyń túrleri keńeıip, laýazymyn tómendetý, qyzmettik deńgeıin ózgertý jáne saılanbaly laýazym ıesin qyzmetine sáıkes emes dep taný sııaqty sharalar engizildi. Jazalardyń qoldanylý merzimi 2 aıdan 6 aıǵa deıin saralanyp belgilengen.
— Budan bólek, profılaktıkalyq yqpal etý sharalary engiziledi. Olardyń qatarynda profılaktıkalyq áńgimelesý, jazbasha eskertý, kásibı quzyretti tekserý, profılaktıkalyq esepke qoıý, minez-qulyq boıynsha jeke usynymdar berý jáne monıtorıng júrgizý bar. Bul sharalar quqyq buzýshylyqtardyń aldyn alýǵa baǵyttalǵan. Osylaısha, jańa zań memlekettik qyzmettiń damýyna zamanaýı jaǵdaı jasap, azamattardyń memlekettik ınstıtýttarǵa degen senimin nyǵaıtýǵa yqpal etedi, — deıdi departament ókili.
Buǵan deıin memlekettik qyzmetshilerdiń týystaryn qyzmetke alýyna baılanysty shekteýler kúsheıtilgenin jazǵan edik.
