Qandyaǵashta 100-den astam adam tamaqtan ýlanyp qaldy
ASTANA.KAZINFORM — Aqtóbe oblysy Muǵaljar aýdanynyń Qandyaǵash qalasyndaǵy «Tumar» meıramhanasyna barǵan azamattar arasynda ishek ınfektsııasy jaǵdaılarynyń tirkelýine baılanysty epıdemıologııalyq tekserý júrgizilip jatyr.
— 19 maýsymnan bastap Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna ishek ınfektsııasynyń belgilerimen 102 naýqas medıtsınalyq kómekke júginip, aýrýhanaǵa jatqyzyldy. Onyń ishinde 34 naýqasta salmonellezdiń yqtımal jaǵdaıy tirkeldi. Atalǵan jaǵdaılar boıynsha Aqtóbe oblysynyń Sanıtarııalyq-epıdemıologııalyq baqylaý departamentine shuǵyl habarlamalar joldanyp, bakterıologııalyq zertteý júrgizý úshin synamalar alyndy.
Aýrýhanaǵa jatqyzylǵan naýqastardyń jaǵdaıy ortasha aýyrlyq dárejesinde dep baǵalanyp otyr. Olarǵa qajetti medıtsınalyq kómek tolyq kólemde kórsetilip jatyr, — delingen habarlamada.
Jaǵdaıdy úılestirý maqsatynda jedel shtab qurylyp, Muǵaljar aýdanyna qosymsha medıtsınalyq brıgadalar jiberildi. Medıtsınalyq uıymdarda qajetti tósek-oryn qory daıyndalyp, dárilik zattardyń jetkilikti qory qamtamasyz etildi.
Búgingi kúni nnaýqastardyń aýrýhana dálizderine ornalastyrylǵany týraly aqparat shyndyqqa sáıkes kelmeıdi.
Baılanysta bolǵan tulǵalardy anyqtaý jáne olardy medıtsınalyq baqylaýǵa alý jumystary júrgizilýde.
Jaǵdaı turaqty baqylaýda.
Aqtóbe oblysy Muǵaljar aýdandyq sanıtarııalyq-epıdemıologııalyq baqylaý basqarmasy qoǵamdyq tamaqtaný nysanynda ótkizilgen is-sharalarǵa qatysqan azamattar arasynda ishek ınfektsııasyna kúdikti toptyq syrqattaný jaǵdaılary tirkelgenin habarlady.
— Syrqattanǵandardyń barlyǵy medıtsınalyq uıymdarǵa jatqyzylyp, qajetti medıtsınalyq kómek alýda. Naýqastardyń jaǵdaıy — dárigerler baqylaýynda.
Qazirgi ýaqytta saraptama júrgizile otyryp, epıdemıologııalyq tekserý jumystary júrgizilip jatyr. Tergep-tekserý aıasynda taǵam ónimderinen jáne qorshaǵan orta nysandarynan synamalar alynyp, zerthanalyq zertteýge jiberildi, — delingen habarlamada.
Epıdemııaǵa qarsy jáne profılaktıkalyq is-sharalardy júrgizý maqsatynda qoǵamdyq tamaqtaný nysanynyń qyzmeti mán-jaılar anyqtalǵanǵa deıin ýaqytsha toqtatyldy.
