Qandyaǵash—Maqat aqyly jolynan 1,8 mlrd teńgeden astam tabys tústi

ATYRAÝ. KAZINFORM — 2025 jylǵy 15 mamyrdan 31 jeltoqsanǵa deıin Qandyaǵash–Maqat aqyly avtojol ýchaskesin paıdalanýdan 1 872 826 250 teńge kóleminde tólem esepteldi. 

Jınalǵan qarjynyń 1 mlrd 303 mln 479 myń 550 teńgesi — rezıdentterden, al 569 mln 346 myń 700 teńgesi — beırezıdentterden túsken.

Bul qarajat avtomobıl jolyn jóndeý jáne kútip-ustaý jumystaryna, jol júrý aqysyn alý júıesiniń baǵdarlamalyq-apparattyq keshenin ustaýǵa, tartylǵan ınvestıtsııalardy qaıtarýǵa, aqyly qozǵalysty uıymdastyrýǵa, sondaı-aq jol-paıdalaný tehnıkasyn satyp alý men qyzmet kórsetýge baǵyttalady.

Aıta keteıik, Aqtóbe–Qandyaǵash–Dossor–Atyraý–RF shekarasy (Qurmanǵazy ótkizý pýnkti) respýblıkalyq mańyzy bar avtojolynyń Qandyaǵash–Maqat aralyǵy 2025 jylǵy 15 mamyrdan bastap 20 jyl merzimge aqyly negizde paıdalanýǵa berilgen.

— Atalǵan aqyly ýchaskeniń jalpy uzyndyǵy 380 shaqyrym 525 metr. Onyń 143 shaqyrym 525 metri Atyraý oblysynyń aýmaǵy arqyly ótedi. Aqyly jol júıesi kólik ınfraqurylymyn turaqty qarjylandyrýǵa, jol sapasyn saqtaýǵa jáne qozǵalys qaýipsizdigin arttyrýǵa baǵyttalǵan. Aqyly joldy paıdalanǵany úshin tólem tek júk kólikterinen ǵana alynady. Al júrgizýshiler úshin balamaly baǵyt retinde Qandyaǵash–Aqtóbe–Oral–Atyraý–Maqat respýblıkalyq mańyzy bar avtojoly qarastyrylǵan, — dedi «Qazavtojol» UK AQ AOF dırektory Ardaq Qaıredenov.

Sonymen qatar, Qazaqstan Respýblıkasynyń «Avtomobıl joldary týraly» zańynyń 5-2-babyna sáıkes birqatar kólik quraly aqyly joldy paıdalanǵany úshin tólemnen bosatylady.

Olardyń qatarynda qyzmettik mindetin atqaryp júrgen jedel járdem, avarııalyq-qutqarý qyzmeti, quqyq qorǵaý organdarynyń arnaıy kólikteri, Qarýly kúshterdiń tehnıkasy, sondaı-aq qala mańyndaǵy turaqty avtobýstar men bir aýdan sheginde qatynaıtyn, tıisti aýmaqta tirkelgen jeńil kólikter bar.

Budan bólek, jergilikti kólik quraldary úshin abonenttik tólem júıesi qarastyrylǵan. Qazirgi ýaqytta jol qozǵalysynyń qaýipsizdigin qamtamasyz etý maqsatynda atalǵan ýchaskede DEÝ-23 jáne Saǵyz DEP mekemeleri qyzmet kórsetip jatyr. Jumysqa 38 maman men 17 arnaıy tehnıka jumyldyrylǵan.

Jýyqta osy jyldyń ishinde Atyraý-Astrahan joly da júk kólikterine aqyly bolatynyn habarlaǵan edik.