Qandy qol izderi men túnde júrgen jasóspirimder: Helloýın qarsańynda Almaty polıtsııasy reıd júrgizdi
ALMATY. KAZINFORM — Polıtsııa kóshede Helloýın merekesin toılap júrgen jasóspirimderdi ustap áketti.
Áleýmettik jelilerde 30 qazan kúni Helloýın merekesin toılap, túrli kostıým kıgen jastardyń vıdeosy tarady. Jeli qoldanýshylardyń sózinshe, artynan olardyń bárin polıtseıler ustap áketti.
Almaty polıtsııa departamenti baspasóz qyzmetiniń málimdeýinshe, Almaly aýdanynyń polıtsııa qyzmetkerleri qoǵamdyq tártip pen azamattardyń qaýipsizdigin qamtamasyz etýge baǵyttalǵan profılaktıkalyq is-sharalar ótkizdi.
— Polıtsııa merekelik is-sharalarǵa, buqaralyq demalys pen qala turǵyndarynyń bos ýaqytyn ótkizýine kedergi keltirmeıdi. Іshki ister organdarynyń basty mindeti — qoǵamdyq oryndardaǵy qaýipsizdikti qamtamasyz etý, quqyq buzýshylyqtar men yqtımal oqıǵalardyń aldyn alý, — dep túsindirdi PD.
Reıdtik is-sharalar barysynda «Arbat» jaıaý júrginshiler aımaǵynda túngi ýaqytta ata-anasyz júrgen 28 jasóspirim anyqtaldy. Olardyń ata-analaryna qatysty ákimshilik materıaldar jınaqtaldy.
Polıtsııa kámeletke tolmaǵandarǵa saǵat 23:00–den 06:00–ge deıin zańdy ókilderinsiz turǵyn úıden tys jerde júrýge tyıym salynatynyn eske saldy.
Sondaı-aq mereke qarsańynda kólikterdi bezendirip, túrli qan izderi, júksalǵyshtan salbyrap turǵan adam denesiniń bólikterin salǵan adamdarǵa eskertý jasaldy. Polıtsııanyń sózinshe, bireýler úshin qyzyq kórinetin bul áreket ózgelerdiń alańdaýshylyǵyn týdyrýy múmkin.
— Qala kóshelerinde qylmys ornyn ımıtatsııalaý — kúmándi bastama. Mundaı kórinister adamdardy úreılendirip, shuǵyl qyzmetterge habarlasýǵa sebep bolýy múmkin. Sondaı-aq jol qozǵalysyna qatysýshylardyń nazaryn aýdaryp, joldaǵy qaýipsizdikke qater tóndiredi, — delingen habarlamada.
Sonymen qatar kólikpen tasymaldanatyn zattar júrgizýshiniń kórý múmkindigin shektemeýi, kólikti basqarýǵa kedergi keltirmeýi, memlekettik nómirler men jaryq quraldaryn jappaýy jáne aınaladaǵylarǵa qaýip tóndirmeýi tıis.
Dekoratsııalardyń sıpaty men anyqtalǵan quqyq buzýshylyqtarǵa qaraı júrgizýshige, sonyń ishinde Ákimshilik quqyq buzýshylyq týraly kodeksiniń 590-baby boıynsha ákimshilik jaýapkershilik júktelýi múmkin.
Polıtsııa júrgizýshilerdi qoǵamdyq joldardy kúmándi tájirıbeler alańyna aınaldyrmaýǵa shaqyrdy.
Eske salaıyq, Almaty polıtsııasy jol erejesin buzýmen tanylǵan bloger Nazar Rollanǵa nege izdeý jarııalaǵanyn túsindirdi.
