Qandaı jaǵdaılarda memlekettik týdy paıdalanýǵa bolmaıdy – mınıstrdiń jaýaby

NUR-SULTAN. QazAqparat – QR Mádenıet jáne sport mınıstri Aqtoty Raıymqulova QR Memlekettik týyn paıdalanýǵa jol berilmeıtin jaǵdaılardy túsindirdi, dep habarlaıdy QazAqparat tilshisi.

«Qazaqstan Respýblıkasynyń Memlekettik týy kólemine qaramastan, ulttyq standartqa sáıkes kelýi tıis. Jeke jáne zańdy tulǵalardyń ulttyq standart talaptaryn buzyp, memlekettik týdy paıdalanýyna jol berilmeıdi. Atap aıtqanda, ulttyq standartqa saı kelmeý degenimiz – Memlekettik týdaǵy nysandy, mólsherdi jáne tehnıkalyq talaptardy buzý. Memlekettik tý ulttyq standartqa sáıkes kelmegen jaǵdaıda, QR Úkimeti aıqyndaǵan tártippen aýystyrylyp, joıylýy kerek», - dep atap ótti mınıstr Ortalyq kommýnıkatsııalar qyzmetinde ótken brıfıngte.

Ákimshilik quqyq buzýshylyq týraly kodekske sáıkes, ulttyq standart talaptaryna sáıkes kelmeıtin memlekettik týdy zańsyz daıyndaǵany úshin ákimshilik aıyppul salynady.

Sonymen birge, jeke jáne zańdy tulǵalar memlekettik týdy mazaq ete almaıdy.

Mınıstrdiń aıtýynsha, QR Úkimetiniń 2020 jylǵy 27 qarashadaǵy №801 qaýlysymen QR Memlekettik týyn, eltańbasyn jáne olardyń beınelerin, QR Memlekettik gımniniń mátinin paıdalaný qaǵıdalaryna ózgerister engizildi. Endigi kezekte bul ózgerister arqyly azamattarymyz úshin Memlekettik týdy paıdalaný aıasy zańnamalyq turǵyda keńeıtilip otyr.

Eń aldymen QR Memlekettik týyn jeke jáne zańdy tulǵalar ǵımarattarda, onyń ishinde balkondarda jáne saltanatty is-sharalar ótkiziletin oryndarda patrıottyq sezimderin, qazaqstandyq biregeıligin bildirý úshin, el azamattarynyń jetistikterin qoldaý maqsatynda paıdalana alady.