Qandaı jaǵdaıda jerasty sýyn alýǵa bolady
ASTANA.KAZINFORM – Sý resýrstary jáne ırrıgatsııa mınıstrligi jerasty sýyn ruqsatsyz alýǵa jáne qandaı jaǵdaıda zań buzylatyny jaıly aqparat jarııalady.
45-bap
Jeke turǵyn úıdegi bir otbasynyń qajetine arnalǵan qudyq ortalyqtandyrylmaǵan aýyz sýmen jabdyqtaýǵa jatady jáne eger táýligine sý alý kólemi 5 000 lıtrden aspaı, sý tek turmystyq maqsatta paıdalanylsa, onda ruqsat talap etilmeıdi.
Jumys kezinde jer betine shyqqan sý
45-bap
Qurylys kezinde, karerde, shahtada nemese paıdaly qazbalardy óndirý barysynda sý shuńqyrǵa jınalyp, keıin soryp shyǵarylsa jáne ol sý ári qaraı paıdalanylmasa, ruqsat qajet emes.
Jaıylymdy sýarý úshin
Eger jerasty sýy tek jaıylymdardy sýarý maqsatynda paıdalanylsa, onda bul jaǵdaıda da ruqsat talap etilmeıdi.
Eger jerasty sýy kommertsııalyq maqsatta nemese úlken kólemde paıdalanylsa, onda bul arnaıy sýdy paıdalaný ruqsatyn talap etedi jáne onsyz paıdalanylǵan jaǵdaıda jerasty sýyn óz betinshe paıdalaný bolyp esepteledi.
Uńǵymalardy arnaıy ruqsatsyz burǵylaǵany jáne paıdalanǵany úshin ákimshilik jaýapkershilik qarastyrylǵan:
• QR ÁQBtK-niń 360-baby 2-tarmaǵy,
• QR ÁQBtK-niń 141-baby 2-tarmaǵy.
45 jáne 93-baptar
Jerasty sýy – ondaǵan jyldar boıy qalyptasatyn strategııalyq resýrs. Ony utymsyz paıdalaný sý qabattarynyń sarqylýyna, aýyzsý sapasynyń tómendeýine jáne jer qabatynyń shógýine ákelýi múmkin. Sondyqtan jerasty sýyn paıdalanýǵa ruqsat almas buryn 45-baptyń 4-tarmaǵyndaǵy talaptardan bólek, myna sharttardy da saqtaý qajet:
1. Jerasty sýynyń rastalǵan qory bolýy tıis.
2. Uńǵymalarda sý deńgeıin ólsheıtin datchık nemese manometr ornatylýy qajet (ózdiginen aǵatyn uńǵymalar úshin).
3. Eger sý alý kólemi táýligine 1 000 tekshe metrden assa, onda qosymsha Ónerkásip mınıstrligine qarasty Geologııa komıtetimen jáne onyń aýmaqtyq bólimshelerimen kelisilgen monıtorıng baǵdarlamasy men sý alý jobasy bolýy qajet.
4. Memlekettik tizimde tirkelgen ólsheý quraldary ornatylýy tıis.
92-bap
Uńǵyma ıeleri sý deńgeıi men sapasyn baqylaýǵa jáne sanıtarlyq talaptardy saqtaýǵa mindetti. Jerasty sýyn paıdalanýǵa arnalǵan barlyq qurylys qorshaǵan ortaǵa jáne jerústi sý aıdyndaryna zııan keltirmeıtindeı etip salynýy tıis.
Kim baqylaý júrgizedi?
- basseındik sý ınspektsııalary – sý qoryn qorǵaý jáne paıdalaný salasyndaǵy memlekettik baqylaý jáne qadaǵalaý boıynsha;
- Ekologııa jáne tabıǵı resýrstar mınıstrligi – sýdyń ekologııalyq jaǵdaıy boıynsha;
- Densaýlyq saqtaý mınıstrligi – aýyzsýdyń sanıtarlyq sapasy boıynsha.
Qazirgi ýaqytta Ulttyq gıdrogeologııalyq qyzmet Sý resýrstarynyń ulttyq aqparattyq júıesi aıasynda «Jerasty sýy» modýlin qurý boıynsha jumys júrgizip jatyr.
Bul modýl jerasty sýynyń jaı-kúıi, qory jáne paıdalanylýy týraly derekterdi esepke alý men taldaýǵa arnalǵan. Sonymen qatar qyzmet derekter bazasyn qalyptastyrýmen, monıtorıng júrgizýmen, sý kadastryna qatysýmen, sondaı-aq ıesiz jáne apatty uńǵymalardy zertteýmen jáne saqtaýmen aınalysady. Bul jerasty sýynyń esebi men baqylaýyn jaqsartýǵa múmkindik beredi.
Aıta keteıik, Qazaqstanda jerasty sýyn basqarýǵa arnalǵan aqparattyq júıeni iske qosý aıaqtaldy.