Qandaı jaǵdaıda terapevtke barmaı basqa dárigerlerge júginýge bolady
PETROPAVL. KAZINFORM — Osy jyldyń 1 sáýirinen bastap Qazaqstanda mindetti áleýmettik medıtsınalyq saqtandyrý (MÁMS) aıasynda azamattardyń tar beıindi mamandarǵa júginý tártibine ózgeris endi.
«Áleýmettik medıtsınalyq saqtandyrý qory» KE AQ Soltústik Qazaqstan oblystyq fılıaly baspasóz qyzmetiniń málimetinshe, bul ózgerister azamattarǵa medıtsınalyq kómekti jedel alýy úshin jasaldy.
Tar beıindi mamandarǵa júginý tártibi bar. Ol úshin azamat medıtsınalyq uıymǵa tirkelýi tıis. Sondaı-aq saqtandyrý mártebesin rastaýy qajet. Budan keıin jalpy tájirıbelik dárigerge kórinip, alǵashqy tekserýden ótý kerek. Alaıda, osy jyldyń 1 sáýirinen bastap keıbir jaǵdaılarda terapevttiń joldamasynsyz beıindi dárigerge júginýge bolady.
Jańa erejelerge sáıkes azamattar kelesi jaǵdaılarda birden mamanǵa bara alady:
— Oftalmologııalyq jáne otorınolarıngologııalyq máselelerdi qosa alǵanda, shuǵyl jaǵdaılar men jaraqattarda;
— Shuǵyl jáne josparly stomatologııalyq kómek alý úshin. Balalar, júkti áıelder, Ekinshi dúnıejúzilik soǵys ardagerleri, zeınetkerler jáne azamattardyń basqa da sanattary joldamasyz stomatologııalyq kómekke júgine alady;
— Dermatovenerologııalyq aýrýlar boıynsha. Teri aýrýlary bar naýqastar dermatologqa tikeleı habarlasa alady;
— Onkologııalyq jáne/nemese gematologııalyq aýrýlarǵa kúdikpen tıisti taldaýlar men medıtsınalyq qondyrǵylarda túsken sýretteri qolda bolǵan kezde;
— Tirkelgen jeri boıynsha akýsher-gınekolog jáne psıholog qabyldaýyna barý úshin terapevtten joldama qajet emes;
— Naýqastyń jaǵdaıyn aýrýdyń profıli boıynsha dınamıkalyq baqylaý. Tar beıindi mamandardyń esebinde turǵan patsıentter olarǵa joldamasyz júgine alady.
— Jastar densaýlyq ortalyqtaryna 14 pen 29 jas aralyǵyndaǵy jastar joldamasyz jazyla alady;
— Bir jaǵdaı boıynsha beıindi mamanǵa qaıta kóriný úshin joldama qajet emes.
Barlyq ózgerister sondaı-aq MÁMS júıesi aıasynda kórsetiletin qyzmetterdiń sapasyn arttyrýǵa baǵyttalǵan.
Sondaı-aq qandaı jaǵdaıda medıtsınalyq qyzmetkerdi úıge shaqyrýǵa bolatyndyǵyn jazǵan edik.