Qandaı jaǵdaıda kólik júrgizýshisi kýáligi talap etilmeıdi - QR ІІM túsindirmesi
NUR-SULTAN. QazAqparat - Sońǵy ýaqytta Qazaqstan azamattarynyń Armenııadan kólik alyp kelýi tyıyldy. Bul týraly QR ІІM Ákimshilik polıtsııa komıteti tóraǵasynyń orynbasary Serik Túsipov aıtty, dep habarlaıdy QazAqparat tilshisi.
«Úkimet qaýlysyna sáıkes, Armenııadan ákelinetin kólikterdi tirkeý merzimi 2021 jyldyń 1 naýryzyna deıin uzartylǵan bolatyn. Degenmen, sońǵy ýaqytta ol jaqtan kólik ákelý toqtap tur. Óıtkeni, shekara jabyq jáne is júzinde syrt elge shyǵý bolmady desek te artyq emes», - dedi komıtet tóraǵasynyń orynbasary BAQ ókilderine bergen suhbatynda.
Sonymen qatar ol qaı ýaqyttan qazaqstandyqtar ózimen birge kólik júrgizýge ruqsat beretin júrgizýshi kýáligi men tehnıkalyq pasportty alyp júrmeýine bolatyndyǵyn túsindirdi.
«Qazirgi ýaqytta bul zań jobasy Májilis qaraýynda jatyr. Ol qabyldanǵannan keıin kóligińiz Qazaqstanda tirkelse, júrgizýshi kýáligin elimizde alsańyz, onda kólik quralyn basqarý úshin sizge ózińizben birge jeke kýáligińizdi alyp júrseńiz jetkilikti bolady. Eger júrgizýshiniń tulǵasyn ne bolmasa atalǵan kólikti anyqtaý qajet bolǵan jaǵdaıda jol júrisine qadaǵalaýdy júzege asyratyn polıtsııa qyzmetkeri elektrondy planshetti paıdalanady. Qazirgi ýaqytta bizde shamamen 9 myń elektrondy planshet bar jáne jol júrisin qadaǵalaýǵa jumyldyrylǵan qyzmetkerlerdiń barlyǵy mundaı qurylǵymen jabdyqtalǵan», - dedi Serik Túsipov.
