Qandaı jaǵdaıda qazaqstandyqtarǵa avtosaqtandyrý qajet emes
ASTANA. QazAqparat - QR Joǵarǵy soty jol-kólik oqıǵasynan keıingi avtomobıl ıesi men zardap shegýshi arasynda týyndaıtyn daýly máselelerdi túsindirdi, dep habarlaıdy QazAqparat.
«Qandaı jaǵdaılarda saqtandyrý mindetti emes? Eger tulǵa kólik quralyn onyń ıesimen eńbek qarym-qatynasy negizinde nemese onyń qasynda bolýymen basqaratyn bolsa saqtandyrý qajet emes. Máselen, kólik kompanııasynyń menshiginde birneshe avtomobıl bolady. Ol paıdalanylatyn árbir kólik quralyna jeke-jeke saqtandyrý shartyn jasasýy qajet. Jáne bul saqtandyrý atalǵan kásiporynnyń avtokólikti basqaratyn kez kelgen jumysshysyna jaramdy bolady», - dedi QR Joǵarǵy sotynyń sýdıasy Alfııa Savınova. Ol Bul jaıynda QR Joǵarǵy sotynyń baspasóz hatshysy Bolat Kalıanbekovtiń Feısbýktegi paraqshasynda jarııalaǵan vıdeoda aıtyldy.
Sýdıa eki kólik soqtyǵysyp, sonyń saldarynan úshinshi azamatqa zardap keletin bolsa, onda atalǵan azamattyń aldynda eki kóliktiń ıesi de jaýap beredi.
«Qalǵan barlyq jaǵdaılarda yntymaqty jaýapkershilik bolmaıdy. Kólik ıeleriniń biri ǵana jaýap beredi. Máselen, JShS júrgizýshisi jol-kólik oqıǵasyn jasaıtyn bolsa, onda shyǵynǵa atalǵan kólik quralynyń ıesi, ıaǵnı seriktestik jaýap beredi», - dedi ol.
Eger onyń jaýapkershiligi saqtandyrylǵan bolsa, onda saqtandyrý shyǵyndaryn saqtandyrýshy kompanııa tóleıdi. Sondyqtan da sot daý týyndaǵan jaǵdaıda jol-kólik oqıǵasy kezinde kólik quralynyń ıesi boldy ma jáne onyń jaýapkershiligi saqtandyrylǵan ba dep suraıdy.
Alfııa Savınovanyń aıtýynsha, kólik quraly qaýiptiligi joǵary dep sanalady. Sondyqtan eger kólik jaıaý júrginshini qaǵyp ketetin bolsa, onda onyń ıesi kinásiz bolsa da jaýap beredi.
Onyń sózine qaraǵanda, 2016 jyly saqtandyrý týraly qoldanystaǵy zańǵa ózgerister engizilgen. Atalǵan ózgeristerge sáıkes, apatqa ushyraǵan kólikti baǵalaý jumystaryn saqtandyrý kompanııasy júzege asyrady. Degenmen, zańmen belgilengen 10 kúndik merzimniń ishinde saqtandyrý kompanııasy baǵalaý júrgizbese, onda zardap shegýshi táýelsiz baǵalaýshynyń qyzmetine júginýine quqyǵy bar. Al onyń baǵalaýy saqtandyrýshy úshin mindetti bolady jáne onymen daýlasa almaıdy jáne saqtandyrý ótemaqysyn tóleýge mindetti.
