Qandaı jaǵdaıda qazaqstandyq bala sheteldikterge asyrap alýǵa beriledi
ASTANA. KAZINFORM — Oqý-aǵartý mınıstrligi sheteldikterdiń bala asyrap alý protsesi nelikten azaıǵanyn túsindirdi.
Mınıstrliktiń aıtýynsha, sheteldik azamattardyń bala asyrap alý tártibi «Neke jáne otbasy týraly» Kodeksi arqyly aıqyndaldy jáne reglamentteledi. Sonymen birge, balany asyrap alýǵa berý talaptary kúsheıtilgen.
− Sheteldikterdiń bala asyrap alýy, eger ol balanyń múddelerine saı bolsa, sondaı-aq týystary men qazaqstandyq azamattar balalardy óz otbasylaryna ornalastyrýdan bas tartqan jaǵdaıda ǵana múmkin bolady. Kodekske sáıkes, Qazaqstanda sheteldik bala asyrap alý rásimi óz qyzmetinen kez kelgen qarjylyq nemese basqa da paıda alýǵa tyıym salynǵan akkredıttelgen kommertsııalyq emes agenttikter arqyly ǵana kózdelgen, − dep jazylǵan Oqý-aǵartý mınıstrliginiń resmı jaýabynda.
Búgingi tańda Qazaqstanda 2 kommertsııalyq emes agenttik akkredıttelgen.
− Degenmen, sońǵy eki jylda balalardy óz otbasylaryna tárbıeleýge alǵysy keletin qazaqstandyq azamattardyń kóbeıýine jáne sheteldikter asyrap alatyn balalardyń bolmaýyna baılanysty osy akkredıttelgen agenttikterdiń qyzmeti toqtap tur, − deıdi mınıstrlik.
Sonymen birge, jyl basynan beri 1487 jetim jáne ata-anasynyń qamqorlyǵynsyz qalǵan bala qazaqstandyq azamattardyń otbasylaryna qorǵanshylyqqa (qamqorshylyqqa), patronattyq tárbıege, patronattyq otbasyna jáne asyrap alýǵa berilgen.
Buǵan deıin Premer-mınıstr Oljas Bektenov Senat jetim balalardy asyrap alý rásimin jeńildetý baǵytynda qandaı sharalar qolǵa alynǵanyn aıtqan edi.
Sondaı-aq, 2025 jyldyń shildesinen bastap otbasylyq ornalastyrýdyń jańa nysany — balany qabyldaýshy kásibı otbasy engiziledi.