Qandaı jaǵdaıda ıpotekalyq nesıe tólemin shegerýge bolady

ASTANA. KAZINFORM – Jibek Joly telearnasyndaǵy «Bugin Live» baǵdarlamasynda turǵyn úı sarapshysy Almajan Qanalına qandaı jaǵdaıda ıpotekalyq nesıe tólemin shegerýge bolatynyn aıtty.

— Tólemdi shegerý degen qaryzdy keshirý emes, ol boryshkerdiń qarjylyq jaǵdaıy kúrt tómendeýine baılanysty ıpotekalyq tólemdi belgili bir ýaqytqa toqtata turý. Bul jeńildik qaryz alýshynyń qarjylyq jaǵdaıy tómendegenine naqty dálel bolǵan kezde ǵana jasalady, - dedi sarapshy.

Sondaı-aq ol turǵyn úı nesıesi tólemin shegerýge negiz bolatyn sebepterdi atap kórsetti.

— Er azamattardyń áskerge shaqyrylýy, dekrettik demalys jáne jumysynan aıyrylý jaǵdaılaryn aıtýǵa bolady. Odan bólek tabıǵı apattar kezinde tólem shegeriledi. Mysaly Atyraýdaǵy sý tasqyny kezinde sol óńirdiń azamattarynyń bárine osy jeńildik jasalǵan bolatyn. Sondaı-aq tótenshe jaǵdaı kezinde de tólem jasaýdy keıinge jyljytýǵa bolady. Esterińizde bolsa, koronavırýs pandemııasy kezinde de osylaı jasalǵan edi, - dedi Almajan Qanalına.

Sarapshynyń aıtýynsha, ár adamǵa beriletin tólem kanıkýly merzimi jeke qarastyrylady. Jaǵdaıdyń mańyzyna qaraı 3-12 aı aralyǵynda shegerýge bolady.

— Bundaı shegerýden keıin ne tólem merzimi uzarýy, ne paıyzdyq mólsherlemesi ózgerýi múmkin. Ár banktiń sharttary ártúrli, ol jerde kelisimsharqa qaraý kerek. Ádette tólemdi shegerý týraly ótinish berilgennen keıin 15 kún ishinde sheshim shyǵady, - dedi ol.

Aıta keteıik, Qazaqstanda ekinshi naryqtaǵy turǵyn úıge arnalǵan tsıfrlyq ıpoteka iske qosylady.