Qandaı jaǵdaıda basqa emhanaǵa tirkelýge bolady
NUR-SULTAN. QazAqparat – «Áleýmettik medıtsınalyq saqtandyrý qorynyń» Nur-Sultan qalasy boıynsha fılıalynyń dırektory Aıdar Sıtqazınov búgin elorda ákimdiginde ótken baspasóz máslıhatynda qandaı jaǵdaıda emhanany aýystyrýǵa bolatynyn túsindirdi, dep habarlaıdy QazAqparat tilshisi.
«Nur-Sultan qalasyndaǵy emhanalarǵa tirkelgender sany boıynsha kórsetkish ártúrli. Mysaly, №9 emhanada 80 myńnan astam adam tirkelgen. Bar bolǵany 2000 adam ǵana tirkelgen medıtsınalyq uıymdar da bar. Tepe-teńdiktiń bolmaýy qala turǵyndarynyń qalaýyna baılanysty: biri úıine jaqyn emhanaǵa tirkelse, endi biri dárigerdi tańdap tirkeledi. Adam kóp tirkelgen emhana soǵan sáıkes qarjylandyrylady. Qajet bolǵan jaǵdaıda, ıaǵnı bólingen qarajat ıgerilmese, qarajat memlekettik-jekeshelik áriptestik aıasynda ózge emhanaǵa aýdarylýy múmkin», - deıdi Aıdar Sıtqazınov.
Ol bir adam jylyna birneshe emhana aýystyra alatynyn aıtty.
«Mysaly, 15 qyrkúıekten 15 qarashaǵa deıin basqa emhanaǵa tirkelýge ýaqyt beriledi. Osy ýaqyt aralyǵynd terrıtorııalyq jaǵynan yńǵaıly nemese dárigeri kóńilińizden shyǵatyn emhanaǵa aýysa alasyz. Qala ishinde bir aýdannan ekinshi aýdanǵa kóshken jaǵdaıda da emhana aýystyrýǵa bolady. Bul jaǵdaı belgili bir aıǵa, ýaqytqa qatysy joq», - deıdi ol.
Sondaı-aq, fılıal dırektory jyl ótken saıyn jeke klınıkalar kóbeıip kele jatqanyn aıtty.
«Áleýmettik medıtsınalyq saqtandyrý qory olarǵa qadam jasap, tirkelgen adam sanyna qaraı qarajat bólemiz. Sondyqtan jaǵdaıyńyzǵa qaraı qandaı emhanaǵa tirkelseńiz de, óz erkińizde, biraq terrıtorııa boıynsha tańdaý qaǵıdasyn ustanýyńyz kerek. Sebebi bizde medıtsınalyq qyzmetti úıge baryp kórsetý túri bar. ıAǵnı bes jasqa deıingi bala aýyryp qalsa, aıaǵy aýyr áıel bolsa dáriger úıge ózi barady. Eger ózińiz basqa aýdanda turyp, basqa aýdanda tirkelgen emhananyń dárigerin úıińizge shaqyrsańyz, dáriger jumysyn qıyndatasyz», - deıdi ol.
Taǵy bir eskeretin jaıt, emhana azamatty basqa emhanaǵa tirkeýmen aınalyspaıdy.
«Basqa emhanaǵa tirkelý úshin ózińiz barýyńyz kerek. Terrıtorııa boıynsha sizge jaqyn jerden jańa medıtsınalyq nysan ashylǵan jaǵdaıda ǵana emhana sizdi ózi tirkeýi múmkin», - deıdi dırektor.
