Qandaı jaǵdaıda adam QR azamattyǵynan aıyrylady — Jańa Konstıtýtsııa jobasy
ASTANA. KAZINFORM — Jańa Konstıtýtsııa mátininde Qazaqstan Respýblıkasynyń azamatynda qos nemese kóp azamattyqtyń bolýyna jol berilmeıtini anyq jazyldy. Bul týraly Konstıtýtsııalyq sot tóraǵasynyń orynbasary Baqyt Nurmuhanov Konstıtýtsııalyq komıssııanyń 6-otyrysynda aıtty.
Spıkerdiń aıtýynsha, «Negizgi quqyqtar, bostandyqtar men mindetter» atty ekinshi bólimniń erejelerin tujyrymdaýda halyqaralyq jalpy tanylǵan aktilerdiń talaptary barynsha eskerildi. Olardyń qatarynda Adam quqyqtarynyń jalpyǵa birdeı deklaratsııasy, Qazaqstan qosylǵan Halyqaralyq paktiler men basqa da qujattar bar.
− Osylaısha adam men azamattyń jeke, áleýmettik-ekonomıkalyq jáne saıası quqyqtarynyń mazmundary tolyqtyrylyp, jańa bir qyrlary ashyldy. Olardy júzege asyrý men qorǵaýdyń kepilderi eleýli kúsheıtildi. Biz buqaralyq talqylaýda adamnyń ómir súrý quqyǵynyń absolıýttigi, onyń jeke basyna tıispeý, «Mıranda» erejeleri, tsıfrlyq dáýirde derbes derekterdi qorǵaý týraly normalar qoldaý taýyp jatqanyn kórip otyrmyz, − dedi Baqyt Nurmuhanov elordada Konstıtýtsııalyq sot ǵımaratynda.
Sonymen birge, Qazaqstan Respýblıkasynyń azamatynda qos nemese kóp azamattyqtyń bolýyna jol berilmeıtini anyq jazyldy. Ózge el azamattyǵynyń bolýy Qazaqstan Respýblıkasynyń azamattyǵyn toqtatýǵa negiz bolady.
− Komıssııanyń alǵashqy otyrystarynda ár adamnyń jeke basynyń bostandyǵy quqyǵyn qylmystyq is júrgizý barysynda qorǵaý kepilderin nyǵaıtý qajettigi aıtylǵan edi. Bul baǵytta keıbir aıryqsha jaǵdaılardy qospaǵanda, adamdy sottyń sheshiminsiz ustaý merzimin 72 saǵattan 48 saǵatqa deıin qysqartý usynyldy. Alaıda keıingi otyrystarda bul másele qyzý talqylanyp, «naqty merzimder zań deńgeıinde belgilense» degen pikirler aıtyldy. Olar jobada eskerildi. 18-bapta sot sheshiminsiz adamdy zańda kózdelgen merzimnen artyq ustaýǵa bolmaıdy, dep berilip otyr, − dedi Konstıtýtsııalyq komıssııa múshesi.
Osylaısha, adamdy kúzetpen ustaýǵa tek sot sheshimimen jol beriledi. Ol tulǵanyń shaǵym jasaý quqyǵy qarastyryldy.
Eske sala ketsek, Konstıtýtsııalyq komıssııanyń 6-otyrysynda jańa Konstıtýtsııa jobasy tanystyryldy.