Qandaı zattardy poıyzda tasymaldaýǵa zańmen tyıym salynǵan
ASTANA. KAZINFORM – «Jolaýshylar tasymaly» AQ temirjol kóliginde tasymaldaýǵa tyıym salynǵan zattar týraly jolaýshylardyń esine saldy.
— Qazaqstan Respýblıkasynyń zańnamasyna sáıkes, qaýipti jáne tyıym salynǵan zattardy poıyzǵa alyp ótý áreketi qylmystyq jaýapkershilikke ákep soǵady. Osyǵan oraı kompanııa jolaýshylarǵa saparǵa shyǵar aldynda alyp júrýge tyıym salynǵan zattardyń tizimimen aldyn ala muqııat tanysý qajettigin qatań túrde eskertedi, — dep habarlady kompanııadan.
Poıyzǵa qandaı zattardy alyp ótýge bolmaıdy?
● Jarylǵysh qurylǵylar men jarylǵysh zattar;
● Radıoaktıvti jáne esirtki zattary, tez tutanatyn suıyqtyqtar men zattar, onyń ishinde benzın, metıl efıri, metanol;
● Janǵysh qatty zattar;
● Suıyq nemese qatty kúıdegi ýly, kúshti áseri bar ýly zattar;
● Juqpaly nemese bıologııalyq qaýipti materıaldar, quramynda osyndaı zalaly bar zattar men buıymdar;
● Atys qarýynyń barlyq túrleri, onyń ishinde laqtyrý, elektrlik, mehanıkalyq qarýlar, aralas, uńǵysyz travmatıkalyq, gazdy, soqqylaý-usaqtaý áreketiniń zattary, shashkalar, qylyshtar, keskishter, ıatagandar, palashtar, shpagalar, túıregishter, qanjarlar, qylysh, shanyshqy, kortıkter, stıletter, kastetter, soıyldar;
● Atys jáne gaz qarýlaryna arnalǵan oq-dáriler, onyń ishinde jaýyngerlik, jaryq-dybystyq, travmatıkalyq áser etetin patrondar, bos, jaraqtalǵan ańshylyq patrondar.
— Sapar aldynda jolaýshylar vokzaldarda mindetti túrde qaýipsizdik tekserýinen ótedi. Búginde elimizdiń iri temirjol vokzaldary rentgen-televızııalyq qondyrǵylarmen, statsıonarlyq jáne qol metall detektorlarymen, sondaı-aq portatıvti anyqtaý qurylǵylarymen tolyq jabdyqtalǵan. Sonymen qatar, beınebaqylaý, dabyl berý jáne kúzet júıeleri úzdiksiz jumys isteıdi. Jolaýshylardyń qaýipsizdigin táýlik boıy polıtsııa qyzmetkerleri men kúzet uıymdarynyń ókilderi qamtamasyz etedi, — delingen habarlamada.
Sapar kezinde de qaýipsizdik únemi qatań baqylaýda. Poıyzdarda ornatylǵan beınebaqylaý júıesi arqyly júrgiziletin jazbalar tek «Jolaýshylar tasymaly» AQ Sıtýatsııalyq ortalyǵynyń ýákiletti qyzmetkerlerine ǵana qoljetimdi. Baqylaý táýlik boıy júzege asyrylady jáne vagondar, kirý-shyǵý esikteri men jalpy qoldanystaǵy aımaqtar arnaıy kameralarmen tolyq qamtylǵan.
Búgingi tańda josparly jumystar nátıjesinde «Talgo» poıyzdarynyń 24 quramynda 1350 beınekamera iske qosyldy.
Eske sala keteıik, buǵan deıin poıyz bıletin kimder jeńildikpen satyp ala alatynyn jazǵan edik.