Qandaı vıdeo oıyndar jadyny jaqsartýǵa kómektesedi?
ASTANA. 4 qarasha. QazAqparat - Nemis ǵalymdary Super Mario vıdeo oıynynyń paıdaly tustaryn atady.
48 erikti azamatqa zertteý júrgizgen ǵalymdardyń qorytyndysy - vıdeo oıyndar keńistikte baǵdar tabýǵa, jadyny jattyqtyrýǵa jáne strategııalyq josparlaý kezinde paıdaly, dep habarlaıdy newsru.com portaly.
«Vıdeo oıyndarynyń kómegimen mıdyń keıbir bólimderin jattyqtyrýǵa bolady», - dep túsindirdi Berlındegi Maks Plank atyndaǵy Adamdy damytý ınstıtýtynyń ókili Zımone Kıýn.
Ǵalymdar magnıttik-rezonantyq tomografııanyń kómegimen tájirıbege qatysýshylardyń mı kólemin baǵalaǵan. Tájirıbe tań qaldyrarlyq nátıje kórsetip otyr: «Super Mario» oınaǵandardyń mı kólemi ulǵaıǵan, onyń oń jaq bóligi ózgeriske ushyraǵan. Mıdyń oń jaǵy keńistikte baǵdar tabýǵa, jadyny jattyqtyrýǵa jáne strategııalyq josparlaýǵa jaýap beretini belgili.
Kıýn men onyń áriptesteriniń pikirinshe, vıdeo oıyndardy shızofrenııa, posttravmatıkalyq stress jáne Altsgeımer aýrýy sekildi psıhıkalyq syrqattar kezinde paıdalanýǵa bolady.
