Qandaı taǵamdardan ýlaný qaýpi joǵary – mamannyń eskertýi
ASTANA. KAZINFORM – Bul jóninde Astana qalasynyń kommýnıkatsııalar qyzmeti uıymdastyrǵan brıfıngte Astana qalasynyń sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva málimdedi.
– Taǵamdyq ınfektsııa qozdyrǵyshtary kóbine saqtaý men daıyndaý talaptaryn qatań saqtaýdy qajet etetin ónimderde kezdesedi. Olardyń qataryna kóp quramdy salattar, krem qosylǵan kondıterlik ónimder, tartylǵan etten daıyndalǵan taǵamdar, jumyrtqa ónimderi, qus etinen daıyndalǵan taǵamdar, balyq pen teńiz ónimderi, jartylaı fabrıkattar jáne daıyn aspazdyq ónimder jatady. Sondaı-aq, durys jýylmaǵan kókónister, jemis-jıdekter men kók shópter de aýrýdyń taralýyna sebep bolýy múmkin. Ónimniń lastanýy ony ósirý men jınaýdan bastap, tasymaldaý jáne satý kezeńine deıingi kez kelgen satyda oryn alýy yqtımal. Sondyqtan jeke gıgıena talaptaryn saqtaý jáne ónimderdi tıisti temperatýrada saqtaý – taǵamdyq ınfektsııalardyń aldyn alýdyń negizgi sharty, – dedi ol.
Sonymen qatar, maman turǵyndarǵa azyq-túlikti tek resmı saýda oryndarynan satyp alýǵa, ónimniń jaramdylyq merzimi men saqtaý jaǵdaıyna nazar aýdarýǵa keńes berdi.
Odan bólek, qoldy, kókónister men jemisterdi muqııat jýyp, taǵamdy durys saqtaý jáne daıyndaý qajettigin eske saldy.
– Balalar men densaýlyǵy álsiz adamdarǵa erekshe kóńil bólgen jón. Al taǵamnan ýlanýdyń alǵashqy belgileri baıqalǵan jaǵdaıda dereý medıtsınalyq kómekke júginý qajet, – dedi Aıgúl Shaǵaltaeva.
Aıta keteıik, buǵan deıin elordada 648 adam jiti ishek ınfektsııasyn juqtyrǵanyn jazǵanbyz.
