Qandaı notarıýstar kóbirek aqsha tabady

ASTANA. QazAqparat - Ádilet mınıstri Marat Beketaev sot oryndaýshylary men notarıýstar arasyndaǵy jumystyń tıimdi amal-ádisin tabý máselesi týraly oıymen bólisti, dep habarlaıdy QazAqparat tilshisi.

«Qazirgi ýaqytta biz sot oryndaýshylyq, advokatýra men notarıat salasyndaǵy tendentsııany kórip otyrmyz. Jańa sıpatta jumys atqaratyn sot oryndaýshylary barshylyq. Máselen, sot oryndaýshy úıinde túnde uıyqtap jatqan kezde oǵan áýejaıdan bireý habarlasyp, ushaqqa otyrýǵa ruqsaty joq ekenin aıtyp shaǵymdanýy yqtımal. Osy rette kúni erteńinde keńsege kelýin ótinip, tutqany qoıa salatyn sot oryndaýshylary bar da, al keı jaǵdaıda koll-ortalyqtyń nómirin beretin de sot oryndaýshylary barshylyq», - dedi Ádilet mınıstri vedomstvonyń keńeıtilgen alqa otyrysynda.

Beketaevtyń aıtýyna qaraǵanda, aıtylǵan sońǵy amal-ádis klıentter úshin tartysta oń nátıjesin beredi.

«Ol habarlasqan adamǵa belgili bir áýejaıda termınalǵa jaqyndap, qaryzdy óteýge bolatyny týraly eskertiledi. Al tutqany qoıa salǵan sot oryndaýshy adamǵa tez arada kómektesýdiń ornyna komıssııa tóleminen qaǵylady. Naqtyraq aıtqanda, bul saladaǵy kásibı mamandardyń arasynda básekelestik qyzaıyn dep tur. Munyń arty álbette, qyzmet sapasynyń jaqsarýyna muryndyq bolady», - dedi Marat Beketaev.

Mınıstr óz sózinde notarıýstyń qyzmetinde de osyndaı báseke bolatynyn aıtady.

«Saǵat 09.00-18.00 arasynda ǵana jumys isteıtin notarıýstar osy kún tártibine úırenip alǵan. Olardyń klıenttik bazasy da bar. Al táýlik boıy qalanyń kez kelgen núktesine jetip, qyzmet kórsetýge daıar notarıýstar kóbirek klıentterge ıe bolady. Adamdar úshin bul júıe óte tıimdi. Tipti meniń de ózim notarıýs qyzmetine qalaı júgingenim esimde. Buryn qalaı edi, búgin qalaı boldy!? Kezek kútip, notarıýsty bir jerge shaqyryp alý kúrdeli edi. Al qazir mundaı máseleler joq», - deıdi Marat Beketaev.